Биотин е всушност друго име на витаминот Б7. Главно тој е поврзано со физиолошките процеси во телото, служејќи како показател за правилното функционирање на црниот дроб. Биотинот делува како катализатор за витални метаболички реакции, учествува како коензим во синтезата на некои масни киселини и при конверзијата на фолна киселина.
Витаминот Х, исто така, го регулира метаболизмот на мастите, придонесува за градење на мускулните ткива, за намалување на лошиот холестерол, забрзување на метаболизмот и за тонирање на телото. Една од главните задачи на биотинот е да обезбеди правилен раст. Тој помага во процесот на синтезата на ДНК, РНК и нуклеинската киселина. На клетките им е особено важен овој витамин, бидејќи им е неопходен за правилен раст и регенерација. Влегува во редот на промоторите на растот. Особено е важен за растот на клетките во целиот организам. Биотинот помага во одржувањето на адекватното ниво на шеќерот во крвта. Лицата со дијабет имаат корист од овој витамин, бидејќи тој ја поттикнува реакцијата на телото на инсулин.
Тој видливо се одразува на кожата бидејќи ја потхранува, а го регулира и мастењето на косата, ја прави поздрава и посјајна, а додека кај ноктите – ги зајакнува и го спречува нивното пожолтување.
Витаминот Х е растворлив во вода, а тоа значи дека доколку организмот не го искористи, тој се елиминира со урината. За разлика од другите витамини, кои телото ги зема од храната, овој витамин се синтетизира со помош на бактериите кои се наоѓаат во дебелото црево. Бидејќи на организмот му се потребни мали количини од овој витамин и бидејќи тој е присутен во многу намирници, а организмот е способен и сам да го произведува, многу ретко се сретнува недостаток на витаминот Х во организмот.
Недостаток на витаминот Х може да се јави кај лица кои биле на долготрајна терапија со антибиотици или биле долго време на инфузија. Први сигнали кои можат да укажат на недостаток на витамин Х во организмот се губење на апетит, кршливи нокти, промени во нивото на шеќерот во крвта, болки во мускулите, замор, сонливост…
