![2](https://panacea.mk/wp-content/uploads/2022/09/2-1-696x522.jpg)
Симптомите на КОВИД се разликуваат по природата и траењето со секоја нова варијанта. Во бранот случеви предизвикани од подваријантата на омикрон ВА.5, одредени симптоми може да траат подолго од другите,
Експертите напоменуваат дека овој пат се забележуваат повеќе симптоми на горниот систем за дишење, како што се болка во грлото, замор, температура и течење на нос. Лекарите додадваат дека сериозноста и видот на симптоми може во голема мера да се разликуваат од лице до лице.
КАШЛИЦА
Д-р Алисон Арвади, од Одделот за јавно здравје во Чикаго, вели дека кашлицата најверојатно е симптомот што се задржува најдолго.
“Кашлицата има тенденција да биде најдолготрајниот симптом. Кога ќе се излекувате, може да се чувствувате подобро, но и понатаму може да имате иритација и кашлица, што не значи дека сте заразни, но тоа е обично последниот симптом што ќе го почувствувате“, објаснува д-р Арвади.
Таа додава дека заморот е уште еден симптом кој може да трае малку подолго. Затоа, се советува да по опоравувањето, полека се враќате на своите рутински активности и само кога ќе се чувствувате подготвени.
КОЛКУ ДОЛГО ТРААТ СИМПТОМИТЕ НА ДОЛГ КОВИД?
Повеќето луѓе со КОВИД се опоравуваат во рок од неколку дена до неколку недели по инфекцијата. Но, за некои, симптомите може да траат многу подолго. Симптомите на продолжениот ковид може да вклучуваат широк спектар на здравствени проблеми кои можат да траат со недели, месеци или години.
Според американскиот Центар за контрола и превенција на болести (ЦДЦ), “Симптомите кај повеќето пациенти полека се подобруваат со текот на времето. Меѓутоа, за некои луѓе, состојбите по закрепнувањето од КОВИД може да траат со месеци, а потенцијално и со години“.
ОСТАНАТИ ДОЛГОТРАЈНИ СИМПТОМИ
Една неодамнешна студија објавена во списанието Northwestern Medicine откри многу симптоми кај лицата кои страдаат од долг ковид, кои сè уште ги доживуваат и до 15 месеци по појавата на коронавирусот. Тие вклучуваат трнење, главоболки, вртоглавица, заматен вид и замор.
- Пократки симптоми
Д-р Арвади напоменува дека треската е еден од главните показатели за зараза, а исто така и еден од првите симптоми што исчезнуваат. “Посветуваме многу внимание на треската бидејќи, додека трае треската, во вашето тело има многу воспаленија, а често сте и многу заразни.
Треската е исто така еден од првите симптоми што може да ги искусат луѓето заразени со КОВИД-19.
- Рани симптоми
Треска, главоболка, болки во грлото или замор се некои од најраните симптоми што вообичаено може да ги доживее заразеното лице, објаснуваат лекарите од Johns Hopkins Medicine.
Некои пациенти исто така доживуваат губење на вкусот или мирисот како ран симптом, но тоа не е толку вообичаено кај најновите варијанти на вирусот.
Студија на истражувачи од Универзитетот Јужна Калифорнија открила дека треската може да биде првиот симптом, по што следи кашлица и болка во мускулите. Потоа, заразеното лице најверојатно ќе почувствува мачнина, повраќање или дијареа.
За некои луѓе, дигестивните симптоми исто така може да бидат прв знак за инфекција со КОВИД. Тие први се развиваат, по што следат респираторните симптоми, можеби еден ден подоцна.