Доколку сте позитивни на КОВИД-19, најголема е веројатноста до зараза да дошло преку директен контакт со инфицирано лице. Но, Светската здравствена организација укажува и на истражувања со кои се разгледувани и други начини на пренос на коронавирусот. СЗО на својата официјална страница објави информации за пренесувањето на коронавирусот добиени од различни студии. Експертите на оваа организација потсетуваат дека вирусот може да го пренесат не само оние лица кои имаат симптоми, туку и асимптоматските случаи – тие се уште поопасни бидејќи често не знаат дека се заразни. Пренесувањето преку директен контакт, потенцираат од СЗО, не е единствениот начин на пренос на новиот коронавирус.
ПРЕНЕСУВАЊЕ ПРЕКУ КОНТАКТ
Коронавирусот може да се пренесе со директен, индиректен или со близок контакт (помалку од еден метар растојание) со лице кое е заразено, односно по капков пат. Тоа може да се случи ако некој кивне, кога ќе се закашла, додека зборува или пее. Во таа ситуација во опасност сте од заразување ако капките дојдат до вапите очи, нос или уста.
ПРЕНЕСУВАЊЕ ПО ВОЗДУШЕН ПАТ
До пренос преку воздух може да дојде кога капките со коронавирусот се поврзат со аеросоли. Тоа може да се случи за време на медицински интервенции, за време на кои се ослободуваат аеросоли, и тоа во затворен простор во кој вентилацијата е лоша. Досега се спроведени различни истражувања на оваа тека и допрва треба да бидат потврдени наодите. Дека ваквиот начин на пренесување на коронавирусот е можен, сугерираат и заразувањата помеѓу хорските проби, рестораните, во фитнес центрите. Сепак, тоа може да го објаснат и други начини на пренесување. Секако, и СЗО, откако на ваквиот начин на пренесување на вирусот укажуваат научниците во светот, призна дека се појавуваат докази за пренесување на КОВИД-19 преку воздух, но побара дополнителни докази за тоа.
ПРЕНЕСУВАЊЕ ПРЕКУ КОНТАМИНИРАНИ ПОВРШИНИ
Капките кои ги исфрла заразеното лице може да контаминираат и различни површини и предмети. Тие површини можат да бидат заразни од неколку часа до неколку дена, во зависност од температурата, влажноста и типот на површината. Затоа, рацете треба да се мијат редовно. Ниту овој начин на пренесување не е стопроцентно докажан, но голема е веројатноста луѓето да се инфицираат и на овој начин.
ПРЕНЕСУВАЊЕ ПРЕКУ ФЕКАЛИИ
РНК на коронавирусот е пронајдена и во урината и во фекалиите на некои пациенти. Сепак, ниту едно истражување не покажало дека некој се заразил на овој начин. Некои студии пријавиле дека е пронајдена и во крвната плазма и во серумот.
ПРЕНЕСУВАЊЕ ОД БРЕМЕНА ЖЕНА НА ФЕТУС
Некои последни истражувања укажуваат дека е можно пренесување на коронавирусот на бебето (фетусот) преку постелката. Но, други истражувања укажуваат дека мајките преку своето млеко не можат да го заразат бебето, и затоа СЗО им препорачува да ги дојат своите деца.
