Благите треперења заради кои имаме чувство дека ни игра окото најчесто траат минута до две, мошне ретко подолго од тоа, а се јавуваат повремено. Станува збор за неволни движења, кои кога се случуваат окото, впрочем, не се ни помрднува – „ни игра“ очниот капак, и тоа во најголем број случаи не е причина за грижа.
Оваа состојба стручно се нарекува миокимија на очниот капак, а може да се јави во долниот или горниот капак, како последица на неволна активност на невроните кои ги стимулираат мускулите во капаците.
Чувството на треперење најчесто се јавува кога сме под стрес, кога консумираме премногу кафе, кога не пиеме доволно вода, кога сме преморени, во сезоната на алергии или кога внесуваме премногу алкохол.
Мошне, мошне ретко може да биде симптом на невролошки пореметувања, но во тие случаи секогаш се јавува во комбинација со други симптоми и трае подолго.
Ако чувството на „играње“ потрае подолго од десет, петнаесет дена, без престан, ако неволни движења на мускулите чувствувате и во други делови од лицето, побарајте лекарска помош.
Под вообичаени околности, мускулот на очниот капак се смирува сам од себе, после неколку минути. Ако ова често ви се случува би требало да се погрижите да спиете повеќе, а можете и да го намалите внесот на кофеин и да направите се што можете да се ослободите од стрес. Понекогаш од помош може да бидат и ладните или топлите облоги на окото.
