Ракот на око може да влиаје на вашиот вид на разни начини. Рако на око е општ термин кој вклучува повеќе видови на тумори. Типот на ракот што го има лицето, зависи од типот на клетки на кои ракот почнува да се развива. Постојат различни делови на окото и на некои од нив тумор се јавува почесто отколку на други.
Британскиот национален здравствен систем (NHS) предупредува дека ракот на око не секогаш предизвикува очигледни симптоми и дека понекогаш може да се открие само во тек на рутински преглед на очите. Симптомите на рак на окото вклучуваат сенки, блесоци на светлина, искривени линии во видното поле или заматен вид. Некои луѓе забележуваат темни дамки во окото кои растат или пак имаат делумно или целосно губење на видот. Останатите симптоми вклучуваат испакнување на едното око, јазол на очниот капак или во окото што се зголемува или болка во или околу окото, иако овие симптоми се доста ретки.
“Многу од овие симптоми можат да бидат предизвикани од помалку сериозни проблеми и болести на очите и не мора да значи дека се работи за рак. Сепак, важно е симптомите да ги провери лекар и да каже што е можно побрзо“, велат во NHS.
Редок вид
Ракот што почнува да се развива во окото се нарекува примарен рак на окото, но понекогаш ракот може да се прошири на окото од други делови на телото и тогаш се нарекува секундарен рак на окото. Кај жените тоа најчесто се случува со ракот на дојка, а кај мажите со рак на белите дробови. Ракот на око инаку е многу редок вид на рак. Имајте на ум дека ракот на око е сепак прилично ретка болест и дека некои други очни болести може да предизвикаат многу од наведените симптоми. Сепак, важно е секој симптом што ќе го забележите да го пријавите на вашиот матичен лекар или оптометрист. Оптометрист е лекар кој е специјализиран за испитување на здравјето на очите. Тој може да дијагностицира состојби и болести на очите, вклучително и рак на око и ќе ве упати кај офталмолог за специјалистичка постапка. Колку порано се открие ракот на окото, толку е полесно да се лекува и поголема е веројатноста терапијата да биде успешна. Затоа, треба да се јавите на лекар веднаш штом забележите некоја невообичена појава во својот вид или окото или ако имате некои од можните симптоми на тумор.
Меланом на око се јавува кога клетките кои лачат пигмент во окото се делат и се размножуваат премногу брзо. Тоа доведува до создавање на акумулирано ткиво, односно тумор. Експертите велат дека се уште не се знае зошто тоа се случува, но следните фактори може да го зголемат ризикот:
- Светла боја на очите – ако имате сини, сиви или зелени очи, имате поголем ризик од развој на меланом на окото во споредба со луѓето кои имаат кафени очи.
- Бела или бледа кожа – меланомот на окото најчесто ги напаѓа белците и е почест кај луѓето со светол тен.
- Необични бенки – ако имате бенки со неправилна форма или необична боја, имате поголем ризик од развој на рак на кожата и меланом на окото.
- Користите солариуми – постојат докази дека изложувањето на ултравиолетовите зраци во солариумите може да го зголеми ризикот од развој на меланом на окото.
- Прекумерна изложеност на сончева светлина – ова го зголемува ризикот од развој на рак на кожата, но може да биде и ризик фактор за меланом на окото.
Ризикот за развој на меланом на окото се зголемува и со возраста, а поголемиот број случаи се дијагностицираат кај лица во 50-тите години од животот.
