Сепсата е најсериозна последица од бактериските инфекции и буквално го тера телото да оди против себе, т.е. организмот самиот да си ги повредува органите и ткивото. Може да се развие од најмало воспаление, а се започнува со некоја инфекција. Оваа болест, за среќа, ретко ги напаѓа луѓето кои се со добро здравје, но кога ќе се активира може да има кобни последици.
Иако лекарите и понатаму не знаат зошто и како доаѓа од инфекција до сепса, таа сепак треба што е можно поскоро да се третира затоа што ако напредува може да се претвори во септичен шок, краен облик на оваа состојба. Кармен Полито, асистентка по медицина на Emory University School of Medicine, опишува дека оваа состојба „го компромитира кардиоваскуларниот состав што резултира со мошне низок крвен притисок и недоволен доток на крв до виталните органи“.
Не постои начин на кој би можела да се тестира, па и сепсата и септичниот шок мошне тешко се дијагностицираат. Но она во што се докторите се сигурни е дека сепсата најчесто е предизвикана од овие четири инфекции: пневмонија, абдоминални инфекции (како воспаление на слепото црево), инфекции на уринарниот тракт, како и кожни инфекции или инфекции на мекото ткиво, објаснува професорот по хирургија Крег Коперсмит, исто така, од Emory University School of Medicine.
Знаците на сепса често се преклопуваат со оние на септичен шок, како што е болното мокрење или проблемите со дишењето. Кога ќе се развие сепсата симптомите се треска, грозница, зголемена температура, слабост, мачнина, повраќање и пролив.
Добро е да се знаат и петте знаци кои укажуваат на ризик од сепса, а, секако, би требало да ги знаете за да можете навремено да реагирате.
Ладни раце
Во случај на сепса телото се ориентира на пумпање крв кон најважните органи, како што е срцето, бубрезите и мозокот, пред останатите делови од телото кои се помалку важни за организмот да преживее, како што се екстремитетите. Затоа и на луѓето кои имаат сепса рацете им се лади и им делуваат слабо или ковчесто заради намалениот доток на крв. Но запаметете – ладните раце не се нуспојава само на смртните болести и би требало да загрижуваат единствено ако доаѓаат со уште некои од знаците за сепса.
Помалку урина или потемна (поконцентрирана) урина
Бубрезите се најзагрозени при сепса затоа што урината почнува да се задржува во телото и во помали количества излегува од телото. Така, концентрирана урината станува потемна и има поинтензивен мирис. Ова може да биде и последица на дехидратацијата која доаѓа заради засиленото потење заради треската, како и заради недоволното внесување течности.
Промена на менталната состојба
Збунетост, намалено ниво на свесност, лекомисленост, како и вртоглавица може да бидат резултат на намалениот доток на крв во мозокот.
Забрзана работа на срцето
Овде не се мисли на малку побрза работа на срцето која се чувствува после џогинг, на пример, туку на чувство дека срцето едноставно ќе излезе од телото заради брзината на отчукувања. Срцето во нормални услови ќе направи околу 60-90 отчукувања во минута, а се што е над 90 и доаѓа во комбинација со уште некој од овие знаци е исклучително загрижувачко.
Проблеми со дишењето
Доколку забележите дека дишењето е забрзано, а вдишувањата се покуси од вообичаено, како штотуку да сте се качувале по скали, а претходно сте имале и пневномија, би можело да се работи за сепса.
НЕ ИЗБРЗУВАЈТЕ!
Доколку почувствувате или кај некој во вашата близина забележите некој од овие симптоми, а при тоа на сето му претходела и некоја од споменатите инфекции, тогаш знаците би требале да бидат повод да побарате лекарска помош бидејќи овде штетата се зголемува со секој час. Во спротивно не се грижете премногу затоа што споменатите симптоми можат да бидат последица на многу и не толку опасни по животот состојби.
