Со оглед дека омикрон продолжува да се шири, ризикот од развој на долгорочни здравствени компликации и понатаму расте. Голема опасност со КОВИД-19 е што никогаш не знаете во која насока ќе одат симптомите. Додека некои имаат само благи симптоми, други се соочуваат со долготрајни здравствени проблеми поттиканти од инфекцијата со коронавирус. Една вообичаена компликација која може да се развие по било какви вирусни инфекции, вклучувајќи го и коронавирусот, е воспалението на бели дробови или пневмонија.
ШТО СЕ СЛУЧУВА ВО БЕЛИТЕ ДРОБОВИ КОГА ВИРУСОТ ЌЕ ВЛЕЗЕ ВО ТЕЛОТО
Може да се јави воспаление на белите дробови со различни степени на тежина – од благи до тешки, како и состојби опасни по живот, како шок, отежнато дишење со акутен респираторен дистрес синдром (АРДС) и оштетувања на бројни органи (повеќеорганско затајување), кое може да доведе до смртен исход.
“Циркулирањето на коронавирусот во крвта (виремија) првите 5-7 дена предизвикува општ инфективен синдром, со пораст на телесната температура, замор, болки во мускулите и зглобовите. Кај дел од болните, по ппочетното подобрување помеѓу петтиот и осмиот ден од болеста, доаѓа до влошување и развој на проблеми со белите дробови. Виремијата поттикнува имунолошкиот одговор на организмот, кој често е несоодветен и претеран. Кај некои лица се развива ‘цитокинска бура’, т.е. излачување на големи количества цитокини од многу имунолошки клетки, кои инаку имаат улога на комуникација и оркестрација на имунолошкиот одговор. Голема количина на различни цитокини предизвикува дисонанца, неускладен, неефикасен и некоординиран воспалителен одговор поради збунувачките и конфликтни сигнали на различни цитокини. Резултатот е дифузно оштетување на клетките на белите дробови, претежно алвеолите, а потоа и ендотелот на пулмоналните капилари. Последици се пневмонија, васкулитис и микротромбоемболизација во белите дробови. Можни се уште потешки компликации како што се сепса, секундарна хемофагоцитна лимфохистиоцитоза (HLH) и автоимуни нарушувања. Една третина од лицата со КОВИД-19 со болничко лекување и прележана пневмонија во состав на ковид инфекцијата по 54 дена имаат радиолошки промени на белите дробови видливи на сликовен приказ на белите дробови (компјутерска томографија или КТ)“, објаснува проф. д-р Сања Поповиќ Грле, специјалист пулмолог.
СИМПТОМИ НА ВОСПАЛЕНИЕ НА БЕЛИ ДРОБОВИ
Почетокот на пневмонијата може да биде ненадеен, да се појави во рок од 48 часа проследена со кашлица со слуз. Густата слуз е жолта, зелена или кафеава, а понекогаш и крвава.
Еден од првите и најзагрижувачки знаци на воспаление на белите дробови може да се забележи при дишењето, кое станува отежнато, односно понапорно и се опишува како “брзо и плитко“. Понекогаш може да се остане без здив, дури и за време на одмор. Може да почувствувате и болка во градите, која се влошува при дишење или кашлање.
Други вообичаени знаци може да вклучуваат забрзано чукање на срцето, висока температура, потење и треперење, губење на апетит и општо чувство дека не се чувствувате добро.
Поретки симптоми се главоболки, замор, гадење, повраќање, болки во зглобовите и мускулите, како и конфузија и дезориентација.
Секој со знаци на пневмонија се препорачува да оди на лекар. Меѓутоа, ако почнете да кашлате крв или имате сериозни тешкотии со дишењето, најдобро е да побарате итна помош.
