Гастритисот е болест која настанува како последица на воспаление на желудочната слузница, а може да биде предизвикан од вирусна или бактериска инфекција, силен стрес или иритации предизвикани од алкохол, лекови, хронично повраќање или претерано лачење на желудочна киселина.
Гастритисот е една од најраширените болести на модерното време, а се манифестира со болки во стомакот, намален апетит, мачнина, повраќање и потенцијално, анорексија. Често е последица на Хеликобактер пилори.
Според причината за настанување, гастритисот може да биде акутен, кој се појавува нагло и поминува за краток временски период, или хроничен, кој може да трае подолго време, дури и повеќе години. Акутниот гастритис најчесто е предизвикан од алкохол или стрес, додека, пак, хроничниот гастритис е последица на долготарјно земање одредени лекарства, позитивен наод на Хеликобактер пилори, некое автоимуно пореметување или како последица на долготрајна иритација од некој вид.
Симптомите на гастритисот се јавуваат постепено, а можат да траат неколку години. Се карактеризираат со болка во стомакот, која најчесто се јавува после јадење и е пропратена со подригнување, повраќање, чувство на тежина во стомакот и често и со пролив. После одредено време се јавува одбојност кон одредени намирници и губење на апетитот, па дури и страв од јадење.
