Може тешко се наоѓа, но вреди да се обидете затоа што нутриционистите ја сметаат за најблагородна билка. Таа е вистински деликатес. Диетална е и полна со витамини и минерали. Соодржи најмногу манган, калиум, фосфор, калциум, натриум, сулфур и магнезиум, додека меѓу витамините доминираат витаминот Ц, провитаминот А и витамините од Б групата. За нејзиниот по малку горчлив вкус е заслужна танинската киселина. Од артичоката се користи само цветот кој се наоѓа на врвот на зеленото стебленце со лисја. Има мала енергетска вредност и речиси незначителни количества маснотија и белковини.
Кога станува збор за лековитоста, важна е затоа што го регулира холестеролот во крвта, поттикнува согорување маснотии, го подобрува варењето и го растоварува црниот дроб. Ја поттикнува работата на бубрезите, го намалува количеството на уреа во крвта, а корисна е и за дијабетичарите затоа што е сиромашна со шеќер.
Треба да ја одбегнуваат доилките затоа што неповолно влијае на излачувањето млеко, но и лицата со чувствителен желудник или оштетувања на црниот дроб и бубрезите.
