Кивате, кашлате, се чувствувате потиштено и уморно? Иако овие чувства може да ве натераат да помислите дека се само симптоми на настинка или есенска алергија, можеби треба да следите како се чувствувате некое време. Ако симптомите се задржуваат или се влошуваат секогаш кога сте дома, тоа може да биде знак дека сте изложени на мувла.
Освен респираторните проблеми, изложеноста на мувла всушност е поврзана со рана појава на деменција и Алцхајмерова болест во претходни истражувања, вели Мајкл Рубино, експерт за мувла и квалитетот на воздухот.
“Поминуваме 90% од нашето време во затворен простор. Секој ден учиме нови работи за сите ефекти што нашите домови можат да ги имаат врз нашето здравје, но сите знаци на некој начин водат на исто место дека ако сакаме да го подобриме нашето здравје, воздухот што го дишеме има многу длабок ефект на тоа“, вели тој.
Ако не сте обрнувале внимание на скриените места каде што мувла расте, изложувањето на мувла со текот на времето може да доведе до сериозни последици. Иако рутинското чистење е исклучително важно за контрола на мувлата во вашиот дом, исто така, внимавајте на скриените знаци на изложеност на мувла пред било која болест да се влоши.
- Може да почувствувате симптоми слични на алергии
Додека алергиите се почести, симптомите слични на алергија, како што се кивање, кашлање, чешање на очите и грлото, затнат нос, иритација на кожата и осип се исто така рани знаци на изложеност на мувла – познати и како токсичност од мувла.
“Обично започнува со невообичаени алергии“, вели Рубино и додава: “Заболените забележуваат дека почесто се разболуваат; можеби носот им е затнат или имаат симптоми од алергиски тип“.
Рубино вели дека овие симптоми на изложеност на мувла може да се појават со различни временски рокови – понекогаш веднаш, а понекогаш со одложени реакции. Ако имате хронични симптоми слични на алергија додека сте дома, разговарајте со вашиот лекар.
- Може да имате проблеми со дишењето
Според Центарот за контрола и превенција на болести (ЦДЦ), изложеноста на мувла исто така може да предизвика симптоми на астма како што се отежнато и тешко дишење. Ова може да биде вообичаен симптом на изложеност на мувла дури и за оние кои немаат сезонски алергии.
ЦДЦ, исто така, укажува на претходни истражувања кои откриле дека изложеноста на мувла може да ја влоши веќе постоечката астма.
- Може да се чувствувате уморно
Да се соочиме со ова: заморот е чест симптом за многумина од нас. Но, Рубино истакнува дека чувството на замор е исто така честа последица од изложеноста на мувла дома.
Студијата од 2013 година објавена во списанието Toxins покажала дека изложеноста на различни видови мувла – особено микотоксини, тип на мувла што може да се развие на храната, како и во топли и влажни услови во домот – може да предизвика чувство на хроничен замор.
