За сладоледот се вели дека е најстариот десерт на светот и во многу земји најпопуларно слатко уживање. Историјата на сладоледот се темели на различни приказни. Според една, Кинезите го подготвувале уште пред 3 000 години и тоа по рецепт кој го познаваме и денес. Но поради мастите и шеќерот се препорачува оние кои сакаат да се ослободат од вишокот килограми да го исклучат од своето мени.
За да може да ужива колку сака во својот омилен леден десерт, слаткарот од Загреб Марио Вујиновиќ смислил сладолед кој може да се јаде и кога практикувате најстрога диета. Така тргнала идејата за сладолед полн со протеини. На прв поглед изгледа како и секој друг, но се разликува во состојките. За разлика од класичниот, протеинскиот сладолед не содржи ниту маснотии ниту шеќери. Има тајна состојка благодарение на која во него може да уживаат и оние кои се на диета, без страв дека ќе се здебелат.
„Протеинскиот сладолед е полн со антиоксиданти, а добар е и за коските, за кожата, за косата и за ноктите“, вели Марио Вујиновиќ, кој има слаткарски стаж од 17 години, а се школувал во странство. Кулинарство, слаткарот од Загреб учел во престижната француска школа Ле Кордон Блу, а подготвувал колачи за американскиот претседател Џорџ Буш кога бил во посета на Хрватска.
