Секој шести човек во светот има проблем со неправилно празнење на цревата. Оваа непријатна појава е три пати почеста кај жените.
Запекот доведува до оштетување на здравјето на целиот организам, затоа внимавајте на опасностите и реагирајте навреме.
ЗАПЕКОТ ГО НАРУШУВА ЗДРАВЈЕТО НА ЦЕЛИОТ ОРГАНИЗАМ
Идеално би било да поминат 12 или најмногу 48 часа од јадење до празнење на цревата. Нашето тело се ослободува од токсините и непотребните необработени материи така што ги испраќа во цревата, кои би требало да исфрлаат отпад. Но, ако страдате од запек, метаболичкиот отпад останува во цревата, се нарушува цревната флора, а насобраните токсини преку крвта стигнуваат до сите органи.
Дијабетес, мултиплекс склероза, Паркинсонова болест, депресија, често може да бидат придружени со проблемот на неправилно празнење на дебелото црево. Запек често се јавува и во текот на бременоста
„Секојдневното празнење на цревата е еден од темелите на нашето добро здравје, а запекот, сепак, го нарушува здравјето на целиот организам. Ако цревата не се празнат редовно, се појавуваат хемороиди, надуеност, болки во стомакот, во цревата се таложат гасови заедно со токсините, проследени со главоболка, малаксаност. Затоа бидете свесни за опасностите и реагирајте на време“, предупредува Славица Тодоровска, магистер по фармација, менаџер на преставништвото на „Хемофарм“ во Р. Македонија.
ШТО ГО ПРЕДИЗВИКУВА ЗАПЕКОТ?
Запекот најчесто е предизвикан од исхрана со малку влакна и прекумерна консумација на млечни производи, особено масни сирења, месо, јајца, сувомеснати меса и храна која го забавува варењето. Некои студии предупредуваат дека чоколадото во големи количини може да предизвика нарушување. Долгото седење, недоволната физичка активност, лошата навика за одржување на столицата, но и некои лекови секако придонесуваат за појава на запек.
„Некои антидепресиви може да предизвикаат запек, па доколку забележите таков проблем, информирајте го вашиот лекар и замолете го да ви го смени лекот. Запек може да предизвикаат и некои лекови против болки, антихистаминици кои ги користиме против алергии, како и лекови за висок крвен притисок. Диуретиците, на пример, го намалуваат крвниот притисок со тоа што го поттикнуваат излачувањето на урината, а водата е потребна за столицата да биде помека и полесно да се исфрли содржината на цревата“, објаснува нашата соговорничка.
Запекот најчесто е предизвикан од исхрана со малку влакна и прекумерна консумација на млечни производи, особено масни сирења, месо, јајца, сувомеснати меса и храна која го забавува варењето. Некои студии предупредуваат дека чоколадото во големи количини може да предизвика нарушување. Долгото седење, недоволната физичка активност, лошата навика за одржување на столицата, но и некои лекови секако придонесуваат за појава на запек
ОДРЕДЕНИ БОЛЕСТИ СЕ ПРИДРУЖЕНИ СО ЗАПЕК
И некои болести често се придружени со појава на запек.
„Дијабетес, мултиплекс склероза, Паркинсонова болест, депресија, често може да бидат придружени со проблемот на неправилно празнење на дебелото црево.
Запек често се јавува во текот на бременоста. Американските студии од Медицинскиот факултет Харвард во Бостон предупредуваат дека послабата активност на тироидната жлезда, хипотироидизмот, ги успорува метаболичките процеси, го успорува варењето, па се препорачува младите кои имаат проблеми со запек да ја проверат функцијата на тироидната жлезда“, вели фармацевтот Славица Тодоровска.
ПРОМЕНЕТЕ ГИ ЖИВОТНИТЕ НАВИКИ
Запекот не е безопасна појава и мора да се лекува.
„Прво променете ги животните навики. Јадете што повеќе свежо овошје и зеленчук, а потоа зготвена храна и оброците нека ви бидат помали и почести. Пијте 2 литри вода дневно за да спречите дехидрација. Движете се, вежбајте. Не го одложувајте движењето на дебелото црево кога чувствувате потреба. Ако сето ова не помогне, побарајте лекарска помош и користете само лаксатив што ви го препишал вашиот лекар. Не користете лаксативи сами, особено не подолг временски период, бидејќи злоупотребата на лаксативи може да предизвика зависност, што значи дека вашите црева во тој случај нема да функционираат правилно без нив“, вели Славица Тодоровска од „Хемофарм“.
Александра Газивода
