Слушањето музика со слушалки може да резултира со трајно оштетување на слухот

Ако не сме внимателни, слушалките може да предизвикаат трајно оштетување на ушите

Слушалките се насекаде околу нас, но тоа не значи дека се безбедни за здравјето. Според студијата објавена во The Journal of the American Medical Association овие мали уреди можат да доведат до губење на слухот и кај младите и кај возрасните.

Честото слушање музика со слушалки може да резултира со појава на зуење во ушите. Главната причина за ова е силината на звукот која ја подесувате на телефонот или музичкиот апарат. Силниот звук предизвикува големи вибрации во увото. Ако ова се практикува секојдневно и во долги временски интервали, може да доведе до оштетување и губење на слухот, затоа што клетките во увото може да не се во можност да се опорават, велат од тимот кој го спровел ова истражување.

Истражувањтео покажало и дека слушалките не мора да бидат подесени на висока фреквенција за да го оштетат звукот. Дури и ако се подесени на умерена јачина, со текот на времето може да доведат до оштетување.

Колку е звукот јак зависи и од јачината подесена на вашиот телефон, како и од квалитетот на слушалките. На пример, 100 % јачина на звукот на ајпод може да достигне јачина од 112 децибели, што за неколку минути може да доведе до оштетување на слухот. Истите слушалки подесени на 60 % јачина, достигнуваат јачина од 80 децибели, па безбедно можете да слушате неколку часа. Ова значи дека силните звуци доведуваат до оштетување на слухот многу побрзо од тивките.

Како да се избегне штетата која слушалките може да ја предизвикаат по нашиот слух?
  • Едноставно, не ги користете често.
  • Намалете ја јачината на звукот на апаратот.
  • Користете слушалки кои го прекриваат увото, место „бубачки“ (кои директно влијаат на ушното тапанче).
  • Силината на звукот подесете ја најмногу на 60 %, и користете ги најдолго 60 минути.