Сите оние кои во просек седат дневно во канцеларија околу шест часа, а сакаат да го изгубат вишокот на килограми би требало ниските работни бироа да ги заменат со високи, покажуваат резултатите од студијата објавена во стручниот магазин „European Journal of Preventive Cardiology“.
Долготрајното седење е поврзано со дебелина, кардиоваскуларни заболувања и дијабетес
Европејците седат во просек до седум часа на ден, а дури и физички активната група на луѓе често го поминува најголемиот дел од денот во седење.
Во просек, учесниците во истражувањето имале 33 години, меѓу нив 60 проценти биле мажи, а просечниот индекс на телесна маса бил малку повисок од препорачаниот.
Истражувачите пресметале дека лице тешко 65 килограми кое во текот на работното време од шест часа би стоело и работело на високо биро годишно ќе изгуби 2,5 кг, со ист дневен внес на калории. За четири години тоа би изнесувало десет килограми.
Еден од авторите на студијата, професорот Франциско Лопез-Хименез, директор на Одделот за кардиологија на клиниката „Мајо“ во Рочестер, изјавил: „Со стоењето не само што се согоруваат повеќе калории, туку се зајакнува и работата на мускулите, што се поврзува со помал број на заболени од срцеви болести, мозочен удар и дијабетес, така што користа е видлива и кај оние кои не се фокусирани само на губење на тежината.“
Би се направил еден чекор понапред доколку луѓето додека стојат прават мали движења, кои не треба да се потценуваат, вели Лопез-Хименез.
„Додека стојат, повеќето луѓе спонтано прават мали потези, на пример, се преместуваат од нога на нога или прават мали чекори напред – назад, а тоа не треба да се потценува. Во секој случај, важно е да се избегне долготрајното седење“, предупредува тој.
Како и секаде, така и овде, студијата треба да се земе предвид, но со доза на претпазливост. Имено, германските лекари сметаат дека опцијата за работа со стоење на високи работни бироа долгорочно не е добро решение за здравјето. Тие се на мислење дека тоа може да резултира со проблеми со мускулно-скелетниот систем, па затоа препорачуваат умереност.
