Постарите луѓе кои ќе ги изгубат брачните партнери може да бидат поизложени на ментално пропаѓање во наредните неколку години и бараат дополнителна поддршка и следење, покажало последното истражување.
Според студијата во која биле опфатени речиси 7 000 средовечни и постари лица, забележано е слабеење на менталните функции кај сите, но многу побрзо и во поголема мера кај оние на кои им починал брачниот другар. Притоа, евентуалното повторно стапување во брак не влијаело на брзината и опсегот на ментални промени.
Истовремено, повисокото ниво на образование или барем еден жив брат или сестра штитат од слабеење на менталните функции поврзани со смртта на брачниот другар, навел тимот на научници во документот, објавен во списанието „American Journal of Geriatric Psychiatry“.
„На сите ни е јасна важноста на когнитивните функции кај постарите лица“, изјавила Гион Ким од Универзитетот „Чунг-Анг“ во Сеул.
„Очекувавме смртта на брачниот партнер да влијае врз менталните функции, но бевме фасцинирани од откривањето на заштитниот ефект на високото образование или барем на еден жив брат или сестра“, изјавила Ким.
Во рамки на истражувањето кое покажува дека стресот придонесува за когнитивно пропаѓање, а смртта на брачниот другар, пак, го зголемува стресот, истражувачите анализирале податоци на 6 766 Американци, постари од 50 години, кои биле опфатени со студијата од 1996 до 2012 година.
Когнитивните функции биле оценувани врз основа на неколку задачи, вклучувајќи и повторување на серија на зборови веднаш или подоцна, броење наназад и способност да се именуваат објекти, како и американски претседатели и потпретседатели.
