Многумина од нас и самите го искусиле тоа на сопствената кожа – како што минуваат годините така станува се потешко да се симне вишокот на килограми и што е уште поважно да не се врати назад. Дали некогаш сте се запрашале зошто со годините се полесно ја качуваме килажата?
Постојат неколку причини, но најголемата од нив е загубата на мускулната маса, којашто се случува со стареењето кај секој човек, вели д-р Каролин Аповиан, директорка на Центарот за исхрана и контрола на телесната тежина во Бостон и заменик-претседател на Здружението за дебелина.
Колку е поголема мускулната маса, толку повеќе калории согоруваме
„Делот од мускулната маса, кој е дефиниран, е најважната работа што ја одредува брзината на метаболизмот. Со други зборови, колку е поголема мускулната маса, толку повеќе калории ќе согоруваме. Мускулната маса почнува да се намалува околу 30.година, а тој процес е наречен саркопенија и се забрзува уште повеќе околу 40. година. Ако не преземеме нешто за да ја заштитиме и изградиме таа дефинирана мускулна маса, на нашето тело ќе му треба помалку калории за да се здебели, метаболизмот ќе се успори, а изгубената мускулна маса ќе ја замени масното ткиво“, објаснува д-р Аповиан.
Заедно со саркопенијата, виновници за поголемата склоност кон дебелеење и отежнато слабеење како старееме со годините се и хормоналните промени, зголемената склоност кон седечкиот начин на живот, зголемената количина на стрес и недостатокот на сон поради се поголемиот број на обврски и одговорности.
