Неизбалансираната исхрана со многу брза храна, премногу сол и недоволно хранливи состојки не само што влијае на општото здравје, туку може негативно да се одрази и на изгледот и здравјето на кожата. За кожата да биде убава и здрава би требало за почеток секојдневно да пиеме соодветно количество вода и во исхраната да вклучиме доволно количество овошје и зеленчук со што е можно поразновидни бои. Имено, различните бои укажуваат на присуство на соединенија кои се познати по благотворното дејство на здравјето на кожата.
Црвеното овошје и зеленчук како што се доматите, црвената пиперка, јагодите, вишните, калинката се богати со антоцијанини и витамин Ц кои заедно го забавуваат процесот на стареење на кожата. Селенот и ликопенот од доматите, исто така, ги ублажуваат оштетувањата настанати од дејството на сончевото УВ зрачење и помагаат во превенцијата од рак на кожа и старечки пеги.
Портокаловата храна како што е тиквата, слаткиот компир и морковот е богата со бета-каротен, витамин Ц и други антиоксиданти.
Зелениот листест зеленчук, исто така, обилува со овие важни соединенија кои ја поттикнуваа регенерацијата на кожата. Синовиолетовите боровинки, исто така, се одличен извор на антиоксиданти (антоцијанини), додека авокадото и оревите се боагти со омега-3 масни киселини кои ја подобруваат еластичноста на кожата и ја зајакнуваат нејзината заштитна бариера.
