Со воспаление на уво ниту под вода ниту во авион

Промената на притисокот во ушите во однос на надворешната средина не е само непријатна, туку може и да се искомплицира.

Лет со авион, нуркање, како и скокање во вода, може целосно да ви ги затне ушите, поради промената на притисокот на воздухот во ушите, во однос на надворешната средина. Во поголем број случаи, опоравувањето од оваа состојба е спонтано и брзо, но може да доведе и до пукање на мембраната на тапанчето.

Оториноларинголозите објаснуваат дека затнувањето на ушите при варијации на притисокот во средното уво може да се надминат ако за време на летот или при нуркање, се придржуваме до одредени правила.

“Ако ви се затнат ушите, затворете ја устата и носот и форсирајте издишување. Тоа може да помогне дополнително да се одзатнат и понекогаш се слуша карактеристично тивко пукање, кое укажува дека воздухот ја отвора Евстахиевата туба. Исто така помага и техниката која поразбира голтање додека носот е затворен, а може да се комбинираат и голтањето и издишувањето“, советуваат лекарите.

Со оглед на тоа дека нуркањето е најсложено, бидејќи лицето се наоѓа во вода, во случај да се почувствува голем притисок или слаба болка, лекарите советуваат нуркачите да се вратат на помала длабочина, додека повторно не се изедначи притисокот, па дури тогаш да продолжат.

Опоравување

Чувството на наглувост и состојбата кога лицето си го слуша гласот посилно од вообичаено, може да потрае и по неколку денови. Понекогаш се јавува и зуење во ушите и вртоглавица. Во вакви случаи неопходна е пауза од летањето или нуркањето додека увото целосно не се опорави.

  • Силна и остра болка во едното или во двете уши претставува сигнал да се престане со активностите
  • Воспаление на горните респираторни патишта, како и активната алергиска состојба со отежнато дишење на нос претставуваат контраиндикации, кога нуркањето е во прашање, а не се советува ни летање со авион. Ако не постои можност да го одложите летот, препорака е при летање да користите капки за нос.
  • Ако состојбата на заглувеност потрае, може да дојде до излевање на течност од крвните садови на слузницата, а потоа и излевање на крв во ушната празнива. Доколку разликата во притисокот е многу висока или наглосе појавува, може да дојде до пукање на мембраната на тапанчето.