Солта е виновник за секоја петта смрт во светот. Најновите истражувања покажуваат дека она што луѓето секојдневно го внесуваат во организмот прави поголема штета на здравјето отколку пушењето. Солта е убедливо најголемиот непријател на човековото здравје. Таа има огромен удел во преработената храна, готовите сосови и јадења, но ја има и во секојдневните намирници како лебот.
Вториот најважен фактор за смртност е надоволното внесување на јаткасти плодови, семки, зеленчук, омега 3 масни киселини и влакна во исхраната.
„Утврдивме дека исхраната е еден од најважните фактори за здравјето на луѓето“, вели Кристофер Муреј, директор на Институтот за проценка и мерење на здравјето на Универзитетот во Вашингтон.
Според проценките на истражувачите од 10 до 11 милиони смртни исходи годишно во светот се последица на кардиоваскуларни болести кои се врзани со лошата исхрана. Консумирање на многу солена храна предизвикува висок притисок, а тоа ја зголемува опасноста од срцев и мозочен удар. Солта исто така влијае и на крвните садови, што води до затајување на срцето.
Целосно спротивен ефект на здравјето има храната од цело зрно, овошјето и зеленчукот. Овие намирници го штитат срцето и ја намалуваат опасноста од срцеви болести.
