Дали месечарењето е наследно пореметување?
Сомнамбулизмот, според резултатите од научните истражувања, е наследно пореметување. Имено, ако еден од родителите пати или пател од сомнамбулизам, детето има три пати поголем ризик да го развие ова пореметување на сонот од децата чии родители никогаш не го имале овој проблем. А ако сомнамбулизмот се јавувал кај двајцата родители, детето има седум пати поголем ризик. Треба навреме да се посвети внимание на зголемениот ризик од ова пореметување зашто епизодите на месечарење не поминуваат секогаш без последици – месечарот често добива модринки и други физички повреди.
Колку честа појава е месечарењето?
Месечарењето е прилично чест проблем, особено кај децата. Се проценува дека 15 до 30 отсто од најмладите имаат барем една епизода на сомнамбулизам за време на детството. Проблемот обично се јавува околу 5 година, а до 11 од сомнамбулизам патат околу 7 отсто од децата. Околу 13 година зачестеноста се намалува на 3 проценти, за во возрасна доба ова пореметување на сонот да е присутно кај 1 до 2 проценти од популацијата. Личноста која месечари не се сеќава дека го напуштила креветот. Обично станува збор за кратки епизоди, во траење од неколку минути, но можат да траат и подолго, до половина час. За време на епизодата сомнамбулизам личноста изгледа како да е будна (со отворени очи) и е способна кратко да одговара на прашања и наредби.
Што се случува кога некој месечари?
Сомнамбулизмот го карактеризираат сложени и автоматски дејства кои личноста ги изведува во фаза на длабок сон, најчесто во првите два часа откако заспала. Во повеќето случаи месечарот шета по собата во која спие или оди во кујната, а може да се случи и да излезе од домот, па дури и да седне зад воланот. Личностите кои месечарат обично спонтано се враќаат в кревет. Меѓутоа, кога некој за време на месечарењето ќе ги разбуди им треба време да се приберат, а дури третина од месечарите може да реагираат агресивно кон личноста која ги разбудила. Иако постои верување дека месечарите никогаш не се повредуваат, дури 50 отсто од овие личности изјавиле дека се повредиле за време на некоја епизода на сомнамбулизам.
