Интернет насилството претставува сериозен општествен проблем и според една неодамнешна британска студија се покажало дека ја погодува секоја втора млада личност! Во ова истражување учествувале 10 020 млади на возраст од 12 до 20 години. Дури 54 проценти од испитаниците изјавиле дека веќе доживеале насилство преку интернет, а во 50 отсто од случаите злоставувањето се однесувало на физичкиот изглед, во 40 насто на интересите на испитаниците, а во 19 проценти на успесите на училиште/факултет.
Кога станува збор за конкретни социјални мрежи на кои и најчесто се случуваат овие напади – 42 проценти од испитаниците доживеале малтретирање на Инстаграм, 37 насто на Фејсбук и 31 процент на Снепчат.
Нападите најчесто се одвиваат преку приватни пораки и негативни коментари под фотографиите.
Објавени фотографии може да укажуваат на депресија
Друга студија, пак, покажала дека фотографиите на социјалните мрежи кријат визуелни знаци кои можат да укажуваат на тоа дека некој пати од депресија.
Група американски научници развиле софтвер кој ги скенира фотографиите и во 70 отсто од случаите точно дијагностицира депресија. Истражувањето покажало дека депресивните поединци споделуваат фотографии кои се потемни и содржат доста сини и сиви нијанси во споредба со оние кои не патат од депресија. Депресивните личности особено користат филтер кој фотографиите во боја ги претвора во црно-бели (Inkwell филтер), додека здравите поединци повеќе сакаат филтри кои фотографиите ги прават потопли и посветли (Valencia филтер). Личностите кои се соочуваат со депресија, исто така, поставуваат фотографии кои содржат помалку човечки лица, веројатно, затоа што одбегнуваат друштвени интеракции.
