Шеќерната болест е едно од најмасовните страдања на современиот човек, болест која лесно се дијагностицира и со правилна едукација одлично се превенира и се контролира. Овој прирачник, пред сé, е наменет за лицата со дијабетес и нивните најблиски, како и на стручните медицински лица кои се занимаваат со нивната едукација. Книгата ја препорачуваме и за студентите, како и за лекарите кои започнуваат да се занимаваат со дијабетес, за полесно стекнување на практични сознанија.
Шеќерната болест или Дијабетес мелитус (Diabetes mellitus) претставува хронична, или, би рекле, уште и доживотна болест, што се одликува со нарушување, пред сѐ, на метаболизмот на јаглехидратите, но и на мастите и протеините и со специфични промени на крвните садови.
ОСНОВНИ ЗНАЦИ
- Слабост и губење на работниот елан, честа желба за спиење и ослабнато памтење.
- Слабеење, што може да биде различно, т.е. од губење неколку килограми (за пократко време), до поизразено губење на телесната тежина често и покрај зголемениот апетит.
- Сушење на устата, со чувство на сувост и на грлото, што доведува до појава на жед и потреба од пиење вода.
- Пиењето вода и мокрењето се постојани, па се нарушува и ноќниот мир.
Зголеменото пиење течности доведува до: Зачестено и изобилно мокрење во текот на денот и на ноќта.
Внимавајте: Доколку чувствувате зголемена жед, немојте да пиете овошни сокови или газирани засладени пијалаци. Пијте само вода!
Други знаци на болеста може да бидат и:
- Честа појава на гнојни мозолчиња по вратот, како и по други делови на телото, што се повторуваат и не реагираат на вообичаената терапија.
- Црвенило со јадеж на половиот орган, што се влошува со миење со сапун и се повторува.
- Зголемен апетит за сите видови храна, можно е и за слатки.
- Бавно зараснување на повредите, особено на раните што гнојат.
- Нарушување во видот.
- При појава на кој било од споменатите знаци, а особено при појава на повеќе од нив заедно, неопходно е да се консултирате со вашиот лекар и да побарате да ви се провери гликемијата.
- Доколку ја откриете болеста порано, дотолку повеќе ќе ги избегнете или ќе ги одложите нејзините компликации.
(продолжува)
