Шеќерната болест е едно од најмасовните страдања на современиот човек, која лесно се дијагностицира и со правилна едукација одлично се превенира и се контролира. Овој прирачник, пред сé, е наменет за лицата со дијабетес и нивните најблиски, како и на стручните медицински лица кои се занимаваат со нивната едукација. Книгата ја препорачуваме и за студентите, како и за лекарите кои започнуваат да се занимаваат со дијабетес, за полесно стекнување на практични сознанија.
Шеќерната болест или Дијабетес мелитус (Diabetes mellitus) претставува хронична, или, би рекле, уште и доживотна болест, што се одликува со нарушување, пред сѐ, на метаболизмот на јаглехидратите, но и на мастите и протеините и со специфични промени на крвните садови.
Самоконтролата претставува подготвеност, желба и знаење самите во секое време да определувате гликемија, како и да ја контролирате вредноста на шеќерот во урината, ацетонот и микроалбумунуријата. Определување на шеќерот во крвта или определување на гликемијата се прави со помош на ленти или/и апаратче за домашна употреба. Всушност и двата начина се исти т.е. методот се состои од земање капка крв од прст, што се нанесува на специјална лента што на едниот крај има реагенс т.е. материја што реагира во присуство на гликоза.
Поновите генерации вакви индикатори или ленти употребуваат технологија што се базира врз создавање електричен напон во присуство на гликоза.
Доколку употребувате ленти на принцип на промена на бојата, тогаш, често не е потребно апаратче за отчитување на бојата, туку можете да ја споредите со боите што се дадени на самото шишенце од лентите. Секако, дека резултатите се далеку попрецизни, доколку бојата ја чита апарат што е наменет за лентите. Другата предност на апаратите е таа што кај нив постои можност за помнење на резултатите (меморирање) и нивна компјутерска анализа.
Денес се употребуваат и апарати за континуирано или постојано следење на гликемијата, што најмногу се употребуваат во клиничката практика, за лица кај кои има чести промени на гликемиите и кај кои се подготвуваме за инсталирање инсулинска пумпа. Овие апарати се уште не се за масовна употреба поради комплицираноста, потребата од компјутерска обработка на податоците, како и високата цена на апаратот. Поради интересот за овие апарати, треба да се каже дека и тие работат со мала канила што се става поткожно и се менува на определено време.
Интензивно се работи на апарат што постојано ќе ја мери гликемијата, но без употреба на игли и канили, т.е. со кожни сензори. Ваквиот апарат поради неусовршеност и промени на кожата не е одобрен за употреба.
Запомнете:
Секој апарат за самоконтрола користи само свои сопствени ленти.
Запомнете:
Не давајте го на заем вашиот апарат.
Запомнете:
Сите грешки во резултатите се должат само на вашето невнимание или неукост. При секоја грешка, повторно прочитајте го упатството.
Запомнете:
Честите самоконтроли значат подобар живот, помалку компликации.
Запомнете:
Отстапувања во резултатите од апарат до апарат се нормална појава и се дозволени од 10 до 15 %, па затоа не треба да го менувате апаратот.
Запомнете:
Многу е поточен вашиот апарат бидејќи истиот го баждарите при секој нов контингент траки, отколку апарат во лабораторија без атест.
Кога треба да правите самоконтрола?
Секогаш кога можете, што почесто. Честите самоконтроли ви го штедат и времето. Не чекајте во редови пред амбулантите. Не губете си ги времето и расположението, не изложувајте се на транспортни трошоци, на атмосферски влијанија и непогоди. На крајот, вие имате и право на дискреција на резултатот. Денес има и апарати со траки за домашна употреба што го определуваат просекот на гликемиите во изминатиот период т.е. ХбА1ц.
(продолжува)
