Шеќерната болест е едно од најмасовните страдања на современиот човек, која лесно се дијагностицира и со правилна едукација одлично се превенира и се контролира. Овој прирачник, пред сé, е наменет за лицата со дијабетес и нивните најблиски, како и на стручните медицински лица кои се занимаваат со нивната едукација. Книгата ја препорачуваме и за студентите, како и за лекарите кои започнуваат да се занимаваат со дијабетес, за полесно стекнување на практични сознанија.
Шеќерната болест или Дијабетес мелитус (Diabetes mellitus) претставува хронична, или, би рекле, уште и доживотна болест, што се одликува со нарушување, пред сѐ, на метаболизмот на јаглехидратите, но и на мастите и протеините и со специфични промени на крвните садови.
Дијабетично стапало
Нега на стапалата кај дијабетичен болен
Здраво стапало кај дијабетичар е одраз на добро регулиран дијабетес, како и основа за долг и пријатен живот. Негата на нозете, особено на стапалата кај болниот од шеќерна болест, е од огромна важност за неговиот живот.
Поради спецификата на системот на крвните садови во нозете (една артерија и големи вени што се изложени на силното дејство на Земјината тежа), поради силната стати-чка оптовареност, како и изложеноста на силни механички влијанија од надворешната средина, особено од сопствените чевли, за нозете се важни следниве препораки:
1. Редовна секојдневна хигиена, поголема од онаа на рацете.
Ова значи редовно секојдневно миење на стапалата со сапун и со млака вода. Забрането е да се користи врела и премногу студена вода. По миењето, стапалата ревносно и педантно да се избришат со сува и чиста памучна крпа. ВНИМАТЕЛНО ДА СЕ ИЗБРИШЕ ПРОСТОРОТ МЕЃУ ПРСТИТЕ. Просторот меѓу прстите мора да биде идеално сув и чист. Секоја лоша хигиена, особено ако е влажно меѓу прстите, доведува до пукнатини на кожата, што се болни. На овие делови се всадуваат бактерии, особено габичките што нормално живеат тука. Поради влажноста, како и поради високите вредности на крвниот шеќер, бактериите и габичките брзо се размно-жуваат, навлегуваат во кожата, а потоа и во циркулацијата. Ова доведува до појава на рани, што може да дове-дат до изумирање на ткивото или до гангрена. Појавата на гангрена е многу сериозна компликација и директно го загрозува животот на болниот.
2. Редовен преглед на стапалата по миење и пред ставање на чорапите.
Прегледот ќе ви мине во навика и мора да го правите редовно, а особено ако почувствувате каква било промена. При прегледот на табаните, задолжително употребувајте огледало.
3. Да се носат чисти памучни чорапи.
Употребата на чорапите од синтетика доведува до зголемено потење, со што значително се зголемува размножувањето на габичките и на бактериите.
4. Да се носат меки и удобни чевли од кожа или од платно, без тврди потполнки кај прстите и кај петицата.
Чевлите мора да бидат точни или сосема малку покомотни. Носењето тесни чевли доведува до појава на плускавци и рани на стапалото. Исти или слични промени се јавуваат и при носење широки чевли. Во случај на појава на плускавец со бистра течност, тој не смее да се отвори или да се дупне.
5. За секоја гребнатинка, плускавец или раничка на стапалото, појава на оток или промена на бојата, веднаш јавете се кај вашиот лекар или во првиот центар за дијабетес.
6. Секое утро, по работа или движење, како и навечер, пред да ставите чорапи, добро размрдајте ги прстите на двете стапала.
7. Не прегрејувајте ги и не преладувајте ги стапалата. Забрането е користење греалки, радијатор или оган за загревање на стапалата.
8. Сечење на ноктите. Ноктите редовно треба да се сечат со криви ножички, а најдобро со педикерска клешта што можете да ја набавите во секоја дрогерија.
Со кривите ножички или со клештата може да се избегне крвавење кога се сече околното ткиво, што често се случува поради невнимание. Ноктите секогаш треба да се сечат по миењето или откако стапалата ќе отстојат во млака вода. Ова е важно за да омекнат ноктите, за потоа правилно да се исечат без да се разресат.
Ноктите треба да се сечат право. Ако се сечат со жилет, нож или со грицкалка за нокти, можете да ја засечете кожата одоколу и да дојде до крвавење, инфекција, гангрена и лош крај. Појавата на стврднувања на кожата, или популарно наречени мозолци (стручно хиперкератоза), бара редовно стручно обработување на педикер или кироподист. Стврднатините доведуваат до пукнатини и се влезна врата за инфекции. По завршената хигиена на стапалото, добро е да се намачка со неутрален крем.
9. Просторот меѓу прстите никогаш да не се мачка со какви било креми.
10. Нозете секогаш да ви бидат топли, но не смеете да ги загревате со греалка, на печка или на кој било извор на топлина.
11. Никогаш не одете боси или без чорапи во чевлите.
12. При долги седења, проодувајте на секој час.
13. Веднаш престанете да пушите.
ЗДРАВОТО СТАПАЛО КАЈ ДИЈАБЕТИЧАРОТ Е ОДРАЗ НА ДОБРО РЕГУЛИРАН КРВЕН ШЕЌЕР, КАКО И ПРЕДУСЛОВ ЗА УДОБЕН И ДОЛГ ЖИВОТ.
(продолжува)
