Шеќерната болест е едно од најмасовните страдања на современиот човек, која лесно се дијагностицира и со правилна едукација одлично се превенира и се контролира. Овој прирачник, пред сé, е наменет за лицата со дијабетес и нивните најблиски, како и на стручните медицински лица кои се занимаваат со нивната едукација. Книгата ја препорачуваме и за студентите, како и за лекарите кои започнуваат да се занимаваат со дијабетес, за полесно стекнување на практични сознанија.
Шеќерната болест или Дијабетес мелитус (Diabetes mellitus) претставува хронична, или, би рекле, уште и доживотна болест, што се одликува со нарушување, пред сѐ, на метаболизмот на јаглехидратите, но и на мастите и протеините и со специфични
промени на крвните садови.
Депресија кај дијабетесот
Депресијата е многу честа промена и придружна појава кај лицата со дијабетес. Првичните симптоми за депресија се: замор, нарушувања во сонот, телесната тежина и апетитот.
Покрај тоа, се јавуваат и следниве знаци:
• Намален интерес за секојдневните активности;
• Губење на телесната тежина, со намален апетит;
• Несоница или сонливост;
• Раздразливост или чувство на отсутност;
• Замор и губење елан за работа;
• Чувство на вина;
• Намалена способност за концентрација и за донесување одлуки;
• Зачестена помисла за смрт и/или суицид;
• Рано будење;
• Губење интерес за секојдневието.
Интересно е што на овие тешкотии поретко се мисли или не се обрнува доволно внимание. Депресијата го влошува дијабетесот, но и нерегулираниот дијабетес побрзо ја влошува или ја зачнува депресијата.
Правилната едукација, знаењето дека имаме одлични можности за лекување на дијабетесот, како и отворањето на личноста кон околината, се добри методи за лекување на депресијата.
(продолжува)
