Шеќерната болест е едно од најмасовните страдања на современиот човек, која лесно се дијагностицира и со правилна едукација одлично се превенира и се контролира. Овој прирачник, пред сé, е наменет за лицата со дијабетес и нивните најблиски, како и на стручните медицински лица кои се занимаваат со нивната едукација. Книгата ја препорачуваме и за студентите, како и за лекарите кои започнуваат да се занимаваат со дијабетес, за полесно стекнување на практични сознанија.
Шеќерната болест или Дијабетес мелитус (Diabetes mellitus) претставува хронична, или, би рекле, уште и доживотна болест, што се одликува со нарушување, пред сѐ, на метаболизмот на јаглехидратите, но и на мастите и протеините и со специфични промени на крвните садови.
Покачен крвен притисок
Покачениот крвен притисок е една од најчестите болести на модерниот човек. Дијабетесот, како хронична болест, е многу често придружен со покачен крвен притисок (артериска хипертензија). Покачениот крвен притисок е причина за дополнително оштетување на крвните садови, особено на мозокот, срцето и на бубрезите. Според тоа, во лекувањето и во превенцијата на дијабетесот особено е важно да се обрне внимание на крвниот притисок, кој треба интензивно и агресивно да се лекува.
Покачен крвен притисок има секој чии вредности се движат над 130/80 мм жива.
Основни правила во превенцијата на крвниот притисок се следниве:
- Неколкупати мерење на притисокот во седната положба;
- Прекинување на пушењето како еден од главните ризик фактори;
- Намалување на телесната тежина;
- Промена во режимот на исхраната, со поголемо внесување зеленчук и со избегнување масти и сол;
- Движење или физичка активност.
Доколку со споменатите мерки притисокот не се намали, тој треба активно, редовно и агресивно да се лекува со средства за третман на крвниот притисок.
Лековите треба да ги препише вашиот дијабетолог. Никако немојте сами да определувате терапија, да ја промените дозата или да ја прекинете терапијата.
За дијабетесот најдобри групи лекови се бета блокаторите и т.н. АСЕ инхибитори. Последните се особено препорачливи доколку имате и промени на бубрезите. Многу пациенти имаат потреба од разни комбинации на лековите или и од примена на трет лек.
Нормализирањето на крвниот притисок е виза за добар и безбеден живот, како и за зачувување на функциите на најважните органи: срцето, мозокот, бубрезите и нозете.
(продолжува)
