Шеќерната болест е едно од најмасовните страдања на современиот човек, која лесно се дијагностицира и со правилна едукација одлично се превенира и се контролира. Овој прирачник, пред сé, е наменет за лицата со дијабетес и нивните најблиски, како и на стручните медицински лица кои се занимаваат со нивната едукација. Книгата ја препорачуваме и за студентите, како и за лекарите кои започнуваат да се занимаваат со дијабетес, за полесно стекнување на практични сознанија.
Шеќерната болест или Дијабетес мелитус (Diabetes mellitus) претставува хронична, или, би рекле, уште и доживотна болест, што се одликува со нарушување, пред сѐ, на метаболизмот на јаглехидратите, но и на мастите и протеините и со специфични
промени на крвните садови.
Половиот орган е најчесто огледало за регулираноста на вашиот дијабетес. Логично е да прашате како?
На половиот орган нормално живеат бактерии и габички, што во нормални услови не предизвикуваат никакви тешкотии. Во случај на промена на средината, на составот на уреата во присуство на шеќер, габичката кандида албиканс, која нормално живее во половиот орган, добива подобри услови за размножување и брзо се размножува. Така, колониите на габичката го покриваат половиот орган на мажот, како и вагиналната шуплина кај жените. Како последица на тоа се јавува интензивно црвенило и упорен јадеж.
Основна грешка е половиот орган да се мие со сапун или со други средства за хигиена (шампони, пени за капење и сл.) Сите средства за хигиена на телото се премногу јаки и и овозможуваат на габичката кандида албиканс неконтролирано да се размножува.
Запомнете: Никогаш немојте да ги миете половиот орган и чмарот со сапун или шампон, ни кога сте болни ни кога сте сосема здрави. Доволно е обична вода за редовна дневна хигиена.
Ако се појави инфекција со споменатата габичка, треба измивања со сода бикарбона (една кафена лажичка во чаша со вода) и маст нистатин или канестен. Ако и по неколку дена нема ефект од терапијата, тогаш треба да се провери и да се регулира крвниот шеќер.
Инфекцијата се повторува секогаш кога ќе се покачи крвниот шеќер!
(продолжува)
