Шеќерната болест е едно од најмасовните страдања на современиот човек, која лесно се дијагностицира и со правилна едукација одлично се превенира и се контролира. Овој прирачник, пред сé, е наменет за лицата со дијабетес и нивните најблиски, како и на стручните медицински лица кои се занимаваат со нивната едукација. Книгата ја препорачуваме и за студентите, како и за лекарите кои започнуваат да се занимаваат со дијабетес, за полесно стекнување на практични сознанија.
Шеќерната болест или Дијабетес мелитус (Diabetes mellitus) претставува хронична, или, би рекле, уште и доживотна болест, што се одликува со нарушување, пред сѐ, на метаболизмот на јаглехидратите, но и на мастите и протеините и со специфични промени на крвните садови.
Алкохол
За алкохолот и за неговото штетно дејство премногу се знае, како од пишувањата, така и од практиката. Многу често поставувано прашање е дали може да се консумира алкохол?!
Одговорот е: ДА
Само, не треба да пиете слатки пијалаци, како што се ликерите, шампањот, други видови (полусуви) вина, како и да внимавате кога пиете пиво. Пивото содржи шеќер и влијае врз гликемијата. Доколку консумирате пиво или слатки пијалаци, тие треба да се одземат од дневниот внес на лебните единици.
Консумирањето други видови алкохол, како што се виното, ракиите и др. жестоки пијалаци, не влијае врз гликемијата.
Но бидејќи алкохолот е многу калоричен (еден грам алкохол ослободува седум калории), тој ќе влијае врз вашата телесна тежина.
Мора да го знаете следново:
1. Умерено да консумирате алкохол;
2. Никогаш да не се опивате;
3. Никогаш да не пиете алкохол на гладно. Секогаш пијте во текот на јадењето или по јадење, бидејќи пиењето алкохол на гладно предизвикува тешки хипогликемии (паѓање на крвниот шеќер). Алкохолот не дозволува ослободување на шеќерот од црниот дроб. Хипогликемиите особено се опасни кога возите, како и ноќе.
4. Доколку пиете, не пијте секој ден, туку секогаш направете пауза, барем два дена во неделата.
5. Трудници со дијабетес не треба да пијат.
6. Најпрепорачливо е црното вино, кое го намалува ризикот од коронарна срцева болест, како и од заболувања на големите крвни садови.
7. Дозволено количество алкохол за мажи се две единици алкохол (вино, пиво или жесток пијалак), а за жени по една единица.
Една чашка (0,3 дл) пијалак содржи околу 10 г алкохол или 60-100 калории.
Особено се препорачува црното вино кое е богато со материи што се нарекуваат антиоксиданси, што помагаат при разложувањето на токсичните материи што се создаваат во организмот. Тоа спаѓа во т.н. медитеранска диета, а го напоменувам од причини што и ние, на некој начин, сме во тоа подрачје и имаме одлични вина.
Медитеранска диета
Овој начин на исхрана е застапен во медитеранскиот појас, што ги опфаќа земјите од Медитеранот и од Блискиот Исток. Забележано е дека луѓето во овие подрачја не се склони кон дебелеење, живеат подолго и посреќно. Се смета дека тоа делумно се должи на исхраната и на начинот на живеење. Имено, жителите од Медитеранот во исхраната користат зеленчук, риба, маслиново масло и црвено вино. Но, сепак, и понагласената физичка активност влијае врз подолгиот животен век на луѓето од Медитеранот.
