Шеќерната болест е едно од најмасовните страдања на современиот човек, која лесно се дијагностицира и со правилна едукација одлично се превенира и се контролира. Овој прирачник, пред сé, е наменет за лицата со дијабетес и нивните најблиски, како и на стручните медицински лица кои се занимаваат со нивната едукација. Книгата ја препорачуваме и за студентите, како и за лекарите кои започнуваат да се занимаваат со дијабетес, за полесно стекнување на практични сознанија.
Шеќерната болест или Дијабетес мелитус (Diabetes mellitus) претставува хронична, или, би рекле, уште и доживотна болест, што се одликува со нарушување, пред сѐ, на метаболизмот на јаглехидратите, но и на мастите и протеините и со специфични промени на крвните садови.
Засладувачи
Тоа се вештачки синтетизирани материи што воопшто немаат или имаат минимални калории, така што, се употребуваат во секојдневниот живот на болните со дијабетес за засладување на храната или на пијалаците.
Најпознати засладувачи се:
• Сахаринот,
• Цикламатот,
• Фруктозата,
• Ксилитот,
• Сорбитолот,
• Аспартамот и
• сите можни мешавини од нив.
Цикламатот и сахаринот воопшто немаат калории и сосема слободно и неограничено долго време може да се употребуваат. Докажано е дека не се токсични. Преостанатите горенаведени материи имаат ниска калорична вредност и може да се употребуваат во ограничени количества или, пак, секојдневно да се пресметува нивната калорична вредност при секое земање, што поради сложеноста не би ви советувал. Сорбитолот може да даде и забрзана работа на цревата, особено ако се користи во поголеми количества (гуми за џвакање).
Според слаткоста што ја даваат, вештачките засладувачи би ги имале следниве индекси:
• Цикламат 30;
• Аспартам 180;
• Ацесулфам 200;
• Сахарин 300;
• Сукралоза 600;
• Алитам 2000.
Таканаречени народни, волшебни лекови или чаеви:
Со еден збор, современата медицина и дијабетологијата не познаваат никакви народни чаеви или лекови што битно позитивно влијаат врз крвниот шеќер или, пак, го лекуваат дијабетесот.
Едноставно речено:
Не употребувајте никакви чаеви или народни лекови, како и лекови што не се испитани или одобрени како помошни лековити средства.
Употребата на ваквите материи повеќекратно ви штети на здравјето, а и материјално ве осиромашува. Освен тоа, природните лекови и чаеви најчесто во себе содржат неконтролирани количества на супстанцата атропин, што може многу лесно да ви го влоши здравјето, па дури и да предизвика смрт. Ако пресметате колку пари сте дале за непотребни или штетни лекови, ќе видите дека со тие пари сте можеле да купите апарат за домашно мерење на шеќерот, што е од првостепена важност за вас.
