Кој спаѓа во ризичната група?
Жените во чие семејство има луѓе кои заболеле од рак општо или, пак, од рак на јајници. Имено, помеѓу 10 и 20 проценти од жените кои заболуваат од рак на јајници имаат лице во тесното семејство кое има рак на јајник или рак на дојка. Покрај тоа, жените во оваа ризична група имаат поголеми шанси да заболат од рак на јајник во помлада животна доба, како што се раните 40-ти. Жените со мутација на гените BRCA1 и BRCA2, имаат помеѓу 16 до 60 проценти шанси да заболат од рак на јајниците;
Жените во постара животна доба – најчесто заболуваат жени во менопауза после 50-годишна возраст;
Жените кои никогаш немале деца;
Жените чиј менструален циклус започнал пред 12-годишна возраст и жените, чија менопауза започнала подоцна од вообичаеното. Имено, колку повеќе менструални циклуси имате, толку е поголема веројатноста да развиете рак на јајници;
Жените кои не можат да забременат – жените кои не користат заштита од зачнување и се сексуално активни, а не можат да останат бремени имаат поголема веројатност да развијат рак на јајник;
Жените кои користат естроген или хормонална терапија – одредени истражувања покажале дека жените кои користат одредени хормонални терапии имаат малку поголеми шанси од развој на рак на јајници. Поради ова, многу гинеколози не препорачуваат хормонални терапии во време на менопауза или препишуваат многу мали дози за да ги намалат симптомите и не препорачуваат долготрајна употреба.
ФАЗИ
Постојат 4 фази на рак на јајниците. Стадиум 1 е кога ракот се наоѓа во еден или двата јајника. Стадиум 2 е кога ракот почнал да се шири и во други делови на карлицата. Во третиот стадиум ракот се проширил на абдоменот. Последната фаза е кога ракот е присутен надвор од абдоменот.
Најчести рани знаци на рак на јајници
Надуеност која не поминува: Ако чувствувате постојана подуеност, која не е како вообичаените и трае три недели или подолго, ова може да биде ран знак за рак на јајниците. Најдоброто нешто што можете да го направите во оваа ситуација е да се консултирате со лекар за да ја добиете точната дијагноза.
Болка во карлицата или долниот дел на стомакот: нормално е жените да чувствуваат болки во стомакот, карлицата и абдоменот пред или за време на менструацијата. Но, кога болката не се повлекува ни по завршување на менструацијата, тоа може да биде знак за рак на јајниците. Особено е важно да се обрне внимание на овој знак бидејќи жените често го мешаат со менструална болка.
Губење на апетитот: Ако забележите дека станувате се помалку и помалку гладни, или воопшто немате апетит во период од три или повеќе недели, треба да се јавите кај вашиот лекар. Ова може да биде проблем со вашиот желудник или црева, но исто така, може да биде и ран знак за рак на јајници, па затоа е најдобро да не го игнорирате.
Ургентна потреба за мокрење: Ако забележите дека постојано трчате во тоалетот за да мокрите, а не сте го смениле количеството на течности кои ги пиете – ова може да биде ран знак за рак на јајници. Ако се чувствувате добро една минута, но две минути подоцна трчате во тоалет, може да се работи и за инфекција на мочниот меур, но исто така, и за рак на јајниците.
