Хроничната ненаспиеност е чест проблем на модерното време. Брзиот начин на живот, стрес и неурамнотежена исхрана се само некои од факторите кои можат да придонесат за лош сон.
А кога сме ненаспани, се знае какви сме. Целиот наш труд и работа во текот на денот лесно може да паднат во вода само затоа што не му овозможуваме доволно одмор на нашиот организам. Секако, можеме да вежбаме, но ако нашите мускули немаат време да се одморат во текот на ноќта, ништо од вежбањето. Истото важи и за исхраната. Витамините и минералите не помагаат ништо ако нашето тело не е доволно одморено за нивна апсорпција.
Но што ако спиете доволно, а се будите преморени? Хроничен замор ве следи во текот на целиот ден и ве спречува да ги извршувате вашите секојдневни обврски.
Она што си поигрува со вашиот биоритам би можел да биде вашиот аларм. Подобро кажано, времето кога ќе одберете да го „навиете“.
Ако често го менувате времето на будење и легнување на спиење, вашето тело станува збунето и сигналите не ги „преведува“ на вистинскиот начин
Решението е во доследноста. Австралискиот лекар и експерт за сон, Кармил Харингтон објаснува:
„Повеќето луѓе не знаат дека времето кога се будат наутро влијае на времето кога ќе можат да заспијат навечер. Кога наутро ќе ја видиме светлината на денот, нашиот мозок го исклучува производството на мелатонин.“
Ако успеете да го усогласите времето кога станувате наутро, ќе се усогласат и останатите биолошки функции и потреби. Времето кога ќе огладнете, ќе бидете жедни, кога треба да одите во тоалет и времето во кое вашиот мозок постигнува максимална ефикасност, се е однапред „запишано“. Токму затоа честите промени имаат негативно влијание врз нас.
Што е поважно, да се усогласи времето на легнување или будење?
„Подеднакво се важни“, тврди Харингтон. „Во комбинација ја диктираат количината на сон кој некој ја постигнува. Но, ако збориме за приоритети, времето кога се будите влијае на времето кога ќе заспиете, па затоа е важно да се „усогласите“. Се препорачува времето на будење да не варира повеќе од еден час.“
