Помалку од шест часа спиење во текот на ноќта или повеќе од десет часа го зголемува ризикот од срцеви заболувања, мозочен удар и дијабетес тип 2. Научниците велат дека во овие случаи се зголемува крвниот притисок, нивото на лошиот холестерол во крвта, може да се покачи и телесната тежина, а покрај тоа, телото е посклоно и кон воспаленија.
Истражувањето покажало дека жените, кои спијат по десет часа, имаат 40 отсто повеќе шанси за развој на здравствени проблеми поврзани со прерана смрт – широка половина (таложење на масни наслаги во пределот на стомакот), висок крвен притисок и покачено ниво на масти или шеќер во крвта.
Недоволно сон води кон воспалителни процеси во телото кои се поврзани со метаболички нарушувања. Покрај тоа, кога се ненаспани, луѓето се посклони кон нездрава храна, која брзо им дава енергија, но, исто така, и се таложи како вишок на килограми
Истражувачите од Универзитетот Сеул ги анализирале податоците на 133 608 луѓе на возраст меѓу 40 и 69 години. Ги прашувале колку долго спијат, вклучувајќи го и спиењето во текот на денот. Нивните навики за спиење ги следеле во текот на една година. Исто така, собирале и примероци од крв, урина и ДНК.
Дел од учесниците покажале знаци на метаболички синдром – премногу масни наслаги околу половината, повисок крвен притисок, високо ниво на шеќер во крвта, ниско ниво на добриот холестерол. Инаку, овој синдром е дефиниран како збир на карактеристики, кои заедно го зголемуваат ризикот од срцеви заболувања, мозочен удар и дијабетес тип 2.
Резултатите од истражувањето биле објавени во списанието „BMC Public Health.“
Идеално е да спие од 7 до 7,5 часа
Според истражувањето на Универзитетот во Источна Финска од 2017 година, најидеално е да се спие од седум до седум и пол часа. Помалку или повеќе спиење од оваа бројка го зголемува ризикот од појава на рак на белите дробови и деменција. Премалку или премногу спиење го нарушува нивото на хормонот за спиење во телото, а тоа може да доведе до развој на тумор.
- Недостатокот на сон, велат научниците, е поврзан и со покачени нивоа на бакар во крвта, што дополнително го зголемува ризикот од рак.
Исто така, било откриено дека неквалитетното спиење го зголемува ризикот од деменција за 1,5 пати. Објаснуваат дека тоа може да биде последица на акумулација на специфичен протеин, кој ја намалува големината на регионот на мозокот поврзан со меморијата од мозокот и го спречува процесот на регенерација на клетките на мозокот.
