Ново истражување на Кралскиот колеџ во Лондон открило дека лицата кои ќе се заразат со омикрон имаат помалку сериозни симптоми од оние кои се заразени со делта варијантата. Откриено е и дека е помалку веројатно лицата по инфицирањето со омикрон да завршат во болница и да го изгубат сетилото за мирис, во споредба со лицата кои се заразени со делта. Исто така, симптомите на омикрон кај вакцинираните лица траат во просек два дена пократко отколку од оние на делта.
Овие сознанија го поткрпеуваат претходните студии кои сугерираат дека времето на инкубација и периодот на инфективност за омикрон е пократок отколку за претходните соеви на КОВИД-19.
ГУБЕЊЕТО МИРИС Е ПОЧЕСТО КАЈ ИНФЕКЦИЈА СО ДЕЛТА
Според новото истражување, губењето на сетилото за мирис се појавило кај 52.7 отсто од случаевите на делта инфекции, а при случаи на омикрон процентот бил помал од 20, што е најголема разлика помеѓу овие две варијанти. Меѓутоа, симптомите на болка во грлото и засипнат глас се појавуваат во случај на инфекција со двата соја.
Пецкање во очите, вртоглавица, треска и главоболка биле симптоми кои биле значително помалку застапени во случаевите на омикрон, велат истражувачите. Иако постојат поинакви симптоми кај двете варијанти, истражувачите од Кралскиот колеџ во Лондон и понатаму советуваат сите да се самоизолираат штом забележат било какви симптоми.
“Иако се уште постои широк распон на времетраењето и сериозноста на симптомите на омикрон, кај вакцинираните лица наидуваме на просек на покусо траење на симптомите. Ова сугерира дека времето на инкубација и периодот на заразност со омикрон може да бидат пократки“, вели проф. Ана Валдес од Универзитетот во Лондон.
