КОВИД-19 може да предизвика намалување на мозочната маса, да влијае на намалување на сивата маса во подрачјата што ги контролираат емоциите и помнењето, како и да ги оштети деловите што го контролираат сетилото за мирис, покажало истражување на научниците од Универзитетот Оксфорд.
Научниците објавија дека ваквите промени се забележани и кај заболените кои не биле хоспитализрани поради КОВИД-19.
За да се утврди дали споменатите последици можат барем делумно да се елиминираат или ќе станат трајни, ќе треба да се направат дополнителни истражувања.
“Располагаме со силни докази за појавата на абнормалности на мозокот по прележување на КОВИД-19“, пишуваат британските научници во студијата објавена во понеделникот во стручното списание Nature.
Дури и во случај на благи форми на болеста помеѓу учесниците во истражувањето откриено е “влошување на извршните функции“ на мозокот, одговорни за фокусирање, планирање, донесување одлуки, организирање и решавање на проблеми, а во просек големината на мозокот на испитаниците се намалила помеѓу 0,2 и 2 проценти.
Рецензираната студија ги истражувала промените на мозокот кај 785 пациенти на возраст од 51 до 81 година.
Скенирањето на нивните мозоци спроведено е двапати, а од вкупниот број на испитаници, 400 од нив се заразиле со коронавирус помеѓу двете скенирања. Второто скенирање е извршено во просек 141 ден по првото.
Студијата била спроведена во време кога во Велика Британија била доминантна алфа варијантата на коронавирусот и малку е веројатно дека во неа биле вклучени пациенти заразени со делта сојот, велат британските научници.
Истражувањето покажало и дека дел од пациентите по прележаниот КОВИД-19 страдале од ‘мозочна магла’ или од намалено внимание и концентрација, како и од намалена брзина на обработка на информациите и послаба меморија.
Научниците не објавија дали вакцинацијата против КОВИД-19 влијаела на состојбата, но британската здравствена агенција минатиот месец објави дека по проучување на 15 претходни утврдена е за половина помала веројатност дека кај вакцинираните лица ќе се развијат симптоми на долготраен КОВИД-19 во споредба со невакцинираните.
