Официјален претставник на Европската агенција за лекови (ЕМА) потврди дека постои “врска“ помеѓу вакцината против КОВИД-19 на АстраЗенека и појавата на тромобоза по вакцинирањето. Марко Кавалери во вчерашното интервју за италијанскиот дневен весник Il Messaggero вели “Сега може да кажеме дека е јасно дека постои врска со вакцината. Меѓутоа, се уште не знаеме што ја предизвикува таа реакција“. Кавалери е задолжен за стратегија со вакцините во ЕМА.
“Да резимирам, за неколку часа ќе кажеме дали постои врска, но се уште мора да утврдиме како тоа се случува“, додава тој.
Европската агенција за лекови, ова прашање ќе го разгледува од вчера до 9. април.
“Настојуваме да добиеме точна слика за тоа што се случува, прецизно да го дефинираме овој синдром кој се појавува поради вакцината. Меѓу вакцинираните постои одреден број на случаи на церебрална тромбоза кај млади лица, поголем од она што би очекувале. Тоа мора да го кажеме“, изјави тој.
Потврдени се десетици такви случаи од кои некои имале смртен исход. Во Обединетото Кралство потврдени се 30 случаи од кои седум се со смртен исход на 18,1 милион вакцинирани до 24. март.
Вчера вечер, ЕМА по изјавата на Кавалери соопшти дека проценката на вакцината на АстраЗенека и натаму трае и дека “се уште не е постигнат заклучок“, како и дека резултатите ќе ги објави денес или утре. Портпаролот на оваа европска агенција одби да ги коментира тврдењата на Кавалери што тој ги даде за италијанскиот весник.
Европската агенција претходно заклучи дека “не е докажана никаква причинска поврзаност со вакцината“, дури и ако е “можна“, истакнувајќи дека придобивките од вакцината се поголеми од ризиците.
Пол Хантер, стручњак за медицинска микробиологија на Универзитетот Источна Англија, вели дека “елементите од доказите сепак одат во прилог на тоа да вакцината на Оксфорд и АстраЗенека е навистина причината“.
Неколку земји поради претпазливост одлучија да не ја даваат вакцината на лица под одредена возраст, како што се Франција, Германија и Канада. Норвешка и Данска засега целосно ја прекинаа нивната употреба.
АстраЗенека во март објави дека не постои „никаков доказ за зголемен ризик“ и во саботата порача дека „безбедноста на пациентите“ е нејзин „главен приоритет“.
