Симптомите на новиот коронавирус SARS-CoV-2 го зафаќаат речиси секој дел од телото, од главата до ножните прсти. Но, нова студија ги потврдува претходните истражувања кои укажуваа на тоа дека еден од најчестите симптоми е температурата.
Во студија објавена пред неколку дена во стручното списание The Journal of Emergency Medicine, научниците ги објавија резултатите од проучувањето на речиси 12.000 пациенти кои биле тестирани на КОВИД-19 во Њујорк.
Во таа група, најчести симптоми кои го следеле позитивниот тест на коронавирус биле: температура – 74 проценти, отежнато дишење – 68 проценти, кашлица – 65 проценти.
Исто така, неодамнешно шпанско истражување спроведено на над 12.000 лица хоспитализирани поради коронавирусот, покажало дека 86 проценти имаат покачена температура, 76 отсто кашлаат и 60 проценти отежнато дишат.
Претходно истражување на пациенти со КОВИД-19 згрижени во болница во Кина, покажало дека 99 отсто од нив имале зголемена температура, 70 проценти пријавиле замор, а 59 проценти имале сува кашлица.
Но, температурата е честа реакција на многу вируси, бидејќи имуниот систем ја зголемува телесната температура во обид да се одбрани и да го уништи “напаѓачот“.
Со оглед дека овој симптом е толку често поврзан со КОВИД-19, многу институции воведоа мерење на телесната температура на вратите за да се обидат да го ублажат ширењето на вирусот.
Сепак, фактот дека немате температура, не мора да значи дека не сте заразени со коронавирус.
Некои инфекции може да бидат проследени со блага температура или со никаква. Околу 40 проценти од инфекциите со коронавирусот може никогаш да не создадат симптоми, што на луѓето кои не се свесни дека се болни им овозможува неколку дена ненамерно да ја пренесат болеста КОВИД-19 на други лица.
