Да се вакцинирате против ковид и грип е одлична работа, но можете да направите многу работи за да го зајакнете вашиот имун систем во борбата со инфекциите.
Пијте доволно вода
Премалку внесување вода ја ослабува природната бариера на слузницата во грлото, ждрелото и носот, тврди Инго Фробосе, професор на Спортскиот универзитет во Келн.
Во исто време, слабее и белодробното ткиво, а а тоа на патогените им го олеснува животот. На секој килограм телесна тежина треба да пиете 30 милилитри течност дневно, по можност вода или незасладен чај. Ако, на пример, имате 70 килограми, тоа значи дека ви требаат 2,1 литри течност дневно.
Професорот вели дека е најдобро со течност да започнете веднаш наутро и да создадете навика да испиете голема чаша вода веднаш по станувањето.
Јадете намирници богати со железо, цинк и селен
Семките од сусам, семките од тиква, овесот и леќата имаат нешто заедничко – изобилуваат со доволни количини на железо и цинк. Овие микронутриенти можат да обезбедат дека нашите Т-клетки, оние што ги откриваат вируси во телото, ќе функционираат добро.
Селенот, исто така, ја помага одбраната на нашето тело и може да се најде во жолчките, кикиритките, интегралните житарици и скушата.
Проф. Фробосе тврди дека со здрава, но разновидна исхрана никакви суплементи или додатоци на исхраната не се потребни.
Правете кратки паузи за одмор
Стресот му штети на телото, па така и на имуниот систем. Го намалува бројот на имунолошки клетки во крвта и Т-клетките. Тоа е дополнителна причина да на организмот редовно му овозможиме паузи. Дури и неколку минути одмор го намалуваат нивото на стрес.
- Вежбајте на свеж воздух
Дури и ако е темно и влажно, вежбањето на свеж воздух е многу корисно, не само за зајакнување на вашиот имун систем, туку и за подобрување на вашето расположение.
Но, проф. Фробосе советува притоа да не се пренапрегате. Наместо тоа, одберете го она што најмногу ви одговара, без разлика дали тоа е трчање или лесна прошетка.
