Едем или отоци, е појава на задржување на поголеми количини течности во организмот. Најчесто се јавува во две форми: генерализирана форма која подразбира задржување на течности и создавање отоци по целото тело и локализирана која се јавува во форма на едем, најчесто на рацете и на нозете.
Причини
Појавата на задржување на течности е присутна најчесто кај жените, во текот на предменструалниот период кога причината за тоа е дисбаланот на хормоните. Поради влијанието на хормоните, овој проблем се јавува и за време на бременоста, а ја снемува по породувањето. Пиењето на орални контрацептивни таблети кои содржат естроген може да предизвика појава на отечени нозе, раце, стомак, понекогаш и надуеност на целото тело. За време на климаксот кај жените, поради намаленото лачење на прогестерон, доаѓа до задршка на течности и чувство на надуеност.
Исхрана со намален внес на витамин Б1, како и протеини,, може да биде предуслов за појава на едем. Лицата кои патат од хронична венска инсуфициенца или проширени вени на нозете, главно ги имаат сите симптоми за задржување на течности. Одредени лекови, меѓу кои и лекови за покачен крвен притисок, кортикостероиди, нестероидни антиинфламаторни лекови имаат својство на здржување течности во организмот, па лицата кои ги користат, може да страдаат од ова состојба.
Органски состојби како предуслов за појава на едем
Симптомот на задржување на течности во организмот, може да биде придружник на сериозни состојби како што се болести на бубрезите (нефротски синдром, воспаление на бубрезите, лупус), каде што едемите карактеристично се локализирани на нозете. Тука се и срцевата инсуфицијенција (слабост на срцето), хипертензија, која влијае на зголемување на крвниот притисок и одделно на зголемување на вкупната течност во организмот. Отоците од болести на срцето се локализирани на нозете и во белите дробови.
Цироза на црниот дроб е болест која предизвикува едеми. Хроничните промени на белите дробови, предизвикуваат локализирани едеми на белите дробови и нозете. Намаленото лачење на тироксин – хормон на штитната жлезда, доведува до хипотиреоза поврзана со појава на едем.
Отечени болни зглобови, при дегенеративни состојби или старост, исто така може да бидат тригер за појава на едем во пределот на лактите, колената, скочниот зглоб и зглобовите на дланките.
