Високиот пулс е сигнал кој организмот го испраќа за промени во физичката, емоционалната или здравствената состојба на човекот. Кога високиот пулс е опасен за здравјето и на што да внимавате?
Пулсот претставува број на ударите на срцето за една минута. Срцевиот ритам е различен во одделни возрасти. На пример, кај бебињата на пет месеци пулсот може да стигне до 180 отчукувања во минута, кај 11-годишните деца до 130 отчукувања, а за сите кои имаат над 18 години нормално е срцевиот ритам да е помеѓу 60 и 100 отчукувања во минута. Секое преминување на таа граница се смета за висок пулс.
Причини и симптоми
Честиот забрзан срцев ритам со медицински термин се нарекува тахикардија. Се манифестира во форма на вртоглавица, бодежи во срцето, задишување, ненадејно чувство на слабост и опуштеност на телото. Кога пулсот е висок, работата на срцето е отежната и тоа не може да пумпа доволно крв во телото, па како последица на што организмот страда од недостаток на кислород и се појавуваат симптомите на тахикардија.
Тахикардија може да е природна (при спортување, вежбање или друг вид на физичко оптоварување) и патолошка (како последица на здравствени проблеми).
Причините за високиот пулс може да се најразлични – од безопасни и времени, до сериозни и трајни. Кај некои забрзаниот срцев ритам е резултат на емоционална нестабилност – стрес, паника, страв, загриженост. Кај други, пак, може да биде предизвикан од проблеми со срцето како што е хипертензијата. Во многу случаи високиот пулс е сигнал за некаков здравствен проблем кој не се забележува со голо око – најчесто со тироидната жлезда, бубрезите или при низок шеќер во крвта.
Висок пулс може да се појави и доколку консумирате енергетски стимуланси, како кафе, тонични пијалаци, алкохол. Забрзаниот срцев ритам, исто така, е поврзан со дехидрација, анемија и треска. Кога не спортувате редовно или имате прекумерна тежина, секој физички напор предизвикува забрзан пулс. Покрај тоа, кога надворешната температура е повисока, постои можност за зголемување на срцевиот ритам.
Во најголем број случаи, високиот пулс е симптом кој не треба да се занемарува, па затоа е препорачливо да се контактира со специјалист (кардиолог или ендокринолог). Забрзаниот срцев ритам не е опасен по здравјето кога е предизвикан од физичка активност. Но, високиот срцев ритам секој ден претставува ризик за срце и треба да му обрнете поголемо внимание на проблемот. Не е исклучено лекарите да препишат и лекови за нормализирање и контрола на пулсот.
Постојат и други методи за „влез на срцето во нормален ритам“, како што е одморот од неколку минути додека сте на работното место, за да се ослободите од напнатоста. Добриот и квалитетен сон е, исто така, важен за одржување на нормалниот ритам на срцето, При појава на висок пулс вдишувајте длабоко преку нос, а издишувајте преку уста.
