Мислењето дека срцевиот удар (инфаркт на миокардот) е болест на повозрасните мажи, повеќе не важи, со оглед на резултатите од најновата студија која укажува дека срцевиот удар се повеќе се појавува кај младите лица, и тоа особено кај жените. Овие резултати се загрижувачки, сметаат стручњаците, и токму затоа треба поголемо внимание да се посвети на здравјето на младата популација.
Зачестеноста на срцевиот удар кај младите жени е зголемена од 21 на 31%, што е значајно поголема во однос на процентот кај помладите мажи.
Исто така, за време на истражувањето е воочено дека младите жени имаат помала веројатност од мажите дека лекарот ќе им препише терапија за намалување на покаченото ниво на холестерол, коронарна ангиографија и коронарна реваскуларизација.
Традиционално, болеста на коронарните артерии се смета за болест на мажите, па за жените кои доаѓаат на одделот за итни случаи со болки во градите, не се смета дека се изложени на голем ризик. Она што треба да се знае е дека презентацијата на срцевиот удар е поинаква кај мажите и жените, а жените имаат поголема веројатност дека кај нив ќе се појават атипични симптоми во споредба со мажите, што може да доведе до ненавремена дијагноза на срцев напад.
Колку за потсетување, главна причина за смртност кај жените е срцевата болест, а не ракот на дојка или ракот на матката.
Истражувањето исто така покажало дека високиот крвен притисок (хипертензија) и дијабетесот се во пораст кај сите пациенти кои имале срцев удар. Во споредба со младите мажи во студијата, младите жени имале поголема веројатност дека ќе имаат висок крвен притисок, дијабетес и хронична болест на бубрезите.
