Секој пат кога ќе се разбудите дехидрирани, телото ви испраќа пораки за тоа што се случува под површината. Организмот не е програмиран така да дехидратацијата ноќе е природна состојба. Студија покажала дека нашиот внатрешен часовник, циркадијалниот ритам одредува колкава количина вода ќе изгубиме додека спиеме, така да телото остане доволно хидрирано преку ноќта.
Но, понекогаш тој механизам се пореметува и тоа најчесто е сигнал дека во организмот нешто се случува. Може да е во прашање хормонален дисбаланс, можеби станува збор за некои навики додека спиете, стил на живот или болести за кои не сте свесни. Но, ако се будите како да сте пропешачиле пустина, тоа значи дека некои работи мора да ги смените.
Симптомите за дехидратација ќе ве следат целиот ден. Студија спроведена на Клиниката Мајо покажала дека дехидратацијата, освен очигледните проблеми, како што е сувоста на устата, предизвикува и вртоглавица, несвестица и збунетост, влијае на концентрацијата, така што на лицата им е тешко да се фокусираат на она што треба да го направат.
Овие се можни причини за утринска дехидрираност:
- Губите течности преку ноќ
Тоа како спиете, може да влијае на дехидратацијата преку ноќ. Дури и ако не заспиете жедни, природно ќе изгубите малку течности само со дишење додека спиете. Но, одредени начини на дишење предизвикуваат дехидратација. Ова особено се однесува на лица кои дишат на уста, ‘рчат или страдаат од апнеа во сон. Ако дишете на нос, нема да изгубите ни приближно толку вода како кога дишете на уста.
- Се потите преку ноќта
Потењето во сон може да биде предизвикано од едноставни работи како презагреана соба, состојби како што се настинка или некоја инфекција. Но, ако сред ноќ се будите мокри од пот, каква и да е причината за тоа, поголема е веројатноста дека ќе се разбудите дехидрирани. Ноќното интензивно потење налага лекарска консултација.
- Имате ниско ниво на естроген
Кај жените во одредена фаза од менструалниот циклус естрогенот паѓа и тогаш организмот побрзо дехидрира генерално, па и преку ноќта. Естрогенот влијае на способноста организмот да задржува течности и кога нивото на овој хормон ќе падне, дали за време на циклусот, или во менопауза, ризикот од дехидратација расте. Естрогенот и прогестеронот влијаат на задржувањето течности во организмот.
- Вежбате доцна навечер
Ако навечер интензивно тренирате, а не пиете доволно вода, исто така ќе го зголемите ризикот од дехидратација. Освен тоа, вежбањето доцна навечер може да ви го поремети внатрешниот часовник, па ќе ви биде потешко да заспиете, па ќе се разбудите изморени и жедни. Доколку сте навикнати да вежбате навечер, обидете се да го поместите тренингот за час или два порано, и водете сметка да испиете доволно вода после тренингот.
- Несакани дејства од лекови
Одредена категорија лекови, на пример, антидепресиви, го зголемуваат ризикот од дехидратација преку ноќта. Во ова група спаѓаат и деконгестанти, како капки за нос, кои го решаваат проблемот со затнат нос, но предизвикуваат сувост во устата. Ако земате лекови поради некоја хронична состојба, проверете со лекарот дали тие можеби се причина за дехидратација преку ноќта.
