Заклучно со неделата – 23.05.2021 во земјава 259.577 лица се вакцинирани со најмалку една доза, додека 38.806 примиле две дози вакцина противв новиот коронавирус, информираат од Министерството за здравство.
Според информациите од Агенцијата за лекови и медицински средства во земјава во периодот од 17.02 до 21.05.2021 година до кај нив се “пристигнати околу 100 пријави на сомнеж за несакани реакции од вакцини против КОВИД-19, по спроведената имунизација на 206.013 лица“.
За кои вакцини, односно по колку пријави за секоја вакцина против КОВИД-19 одделно има, од МАЛМЕД не одговорија. Во Македонија, засега не постои можност за избор на вакцина, туку граѓаните ја добиваат онаа вакцина што е на располагање во моментот. Досега за заштита од вирусот SARS-CoV-2 се користени вакцините Фајзер, АстраЗенека, Спутник и Синофарм, а од јуни се најавува и уште една кинеска вакцина.
“Најчесто се пријавени несакани реакции со лесна симптоматологија, како болка и оток на местото на апликација на вакцината, покачена телесна температура, главоболка, болка во мускулите и малаксаност. Сите досега пријавени несакани реакции се опишани во упатствата за употреба на вакцините“, вели д-р спец.мед Искра Садикаријо, од Агенцијата за лекови и медицински средства.
“Агенцијата за лекови и медицински средства има потпишано договор за соработка со Uppsala Monitoring Centre (UMC) – глобална електронска база на податоци за несакани дејства на лекови на Светската здравствена организација со седиште во Шведска. Сите пријави кои се доставени до МАЛМЕД се обработуваат и проследуваат до UMC и стануваат дел од документацијата за безбедноста на лекот“, додава д-р Садикаријо.
Според описот на пријавените нуспојави, експертите истите ги вбројуваат во очекувани и чести несакани реакции, слични на нуспојавите на останатите вакцини и дека се сметаат за со благ до умерен интензитет кои спонатно поминуваат за неколку дена илои со примена на симптоматска терапија (студени облоги, лекови за намалување на зголемена телесна темпераура и лекови против болка).
Засега во МАЛМЕД не е пристигната ниту една пријава за сомнеж на несакана реакција со смртен исход за која е утврена причинско-последична поврзаност со вакцинацијата.
Секој граѓанин, преку својот матичен лекар, специјалист или лично може да пријави несакана реакција од вакцината против КОВИД-19. Секоја пријава “станува дел од документацијата за безбедноста на лекот, врз основа на која се издаваат препораки за негова безбедна употреба во однос на правилно дозирање, контраиндикации, посебни предупредувања, интеракции со други лекови како и мерки за минимизирање на појавата на несакани реакции“.
На интернет страницата на МАЛМЕД постои он-лајн апликација за пријавување на несакани реакции за пациенти, која може да ја пополни секој граѓанин.
“МАЛМЕД ќе ја обработи Вашата пријава и ќе ја внесе во Националната база за нескани реакции од лекови и случајот ќе стане дел од докуменацијата за безбедноста на лекот.
Вашата пријава за несаканите симптоми/реакции, кои се сомневате дека се предизвикани од употребата на лекот, може да помогне да се намали честотата на нејзино појавување или да биде избегната. Можете да пријавите несакана реакција која сте ја почуствувале лично, ја почуствувало Вашето дете или личноста за која се грижите“, пишува на страната на Агенцијата.
