Да се намали ризикот од срцев удар може ако се престане да се пуши, редовно се контролира крвниот притисок, се намали високото ниво на холестерол, се води сметка за телесната тежина, а ако имате дијабетес редовно се оди на лекарски прегледи.
Но како да се однесувате ако веќе сте преживеале удар?
Ова се некои од промените кои е потребно да се прифатат во секојдневието за да се намали ризикот од повторување на срцевиот удар.
Внимавајте што јадете
Здравата и правилна исхрана е најдобар начин за заштита на кардиоваскуларното здравје. Сами одредете колку килограми мора да ослабете и колку калории во текот на денот сакате да внесете во организмот. Прескокнете ги намирниците кои се обработени, неквалитетни, полни со шеќер и сол. Алкохолот исфрлете го во целост.
Движете се
Кардио вежбите може да направат чудо за здравјето на срцето – го јакнат и го намалуваат крвниот притисок, како и нивото на холестерол. Исто така, делуваат релаксирачки што помага по денот полн со стресни ситуации. Според стручњаците, најдобро е да се вежба 150 минути неделно, а може да се одберат активности како пешачење, трчање, пливање или дури и домашни активности. Но, пред да почнете со каква било активност, консултирајте го својот лекар.
Контрола на притисокот
Лицата кои боледуваат од покачен крвен притисок се под зголемен ризик за појава на болести на срцето. Затоа е потребно добро да се регулира притисокот. Не само со пиење лекови, туку и со начинот на живот што се однесува на правилна и, пред се, несолена исхрана, пиење доволно вода, редовна физичка активност и избегнување на седечкиот начин на живот.
Не заборавјте на сонот
Лошиот сон кај некои лица може да предизвика брз, неправилен атријски ритам, кој може да биде причина за појава на мозочен или срцев удар, покажале некои студии. Американските научници неодамна открија дека испрекинатиот сон може да го донесе срцето во ваква состојба што дополнително го оптеретува телото и предизвикува аритмија.
