СТЕ ПРЕЛЕЖАЛЕ КОВИД-19, А НЕ ЗНАЕТЕ ДАЛИ СТЕ РАЗВИЛЕ АНТИТЕЛА? Откриено колку долго трае заштитата на организмот по инфекцијата

Нова студија дала одговор на едно од најпоставуваните прашања од почетокот на пандемијата – колку долго по заразата, антителата остануваат во организмот.

Студијата објавена во списанието Nature Microbiology се темели на испитување на антитела кај 38 пациенти и здравствени работници во болницата Св. Томас, кои биле заразени за време на првиот бран на коронавирусот, пред да бидат вакцинирани.

И покрај почетниот пад на нивото на антитела непосредно по инфекцијата, резултатите покажале дека кај повеќето лица (18/19 пациенти) откриени се антитела и 10 месеци откако биле заразени.

Истражувачкиот тим предводен од д-р Кети Дорс од Школата за имунологија и микробиолошки науки, тестирал и како антителата создадени за борба против специфична варијанта на SARS-CoV-2 ќе реагираат на останатите варијанти. Се покажало дека антителата генерираат силен одговор на повторна инфекција со истиот сој, но биле помалку ефикасни во борба против останатите соеви, пренесува Кралскиот колеџ во Лондон.

Антителата се врзуваат за шилестиот протеин на вирусот SARS-CoV-2, а вакцините го имитираат овој протеин за да се создадат имунолошки одговор. Меѓутоа, мутациите во новите соеви на вирусот (алфа, бета, делта) создадоа загриженост околу тоа дали вакцините кои се развиени за да ја таргетираат оригиналната варијанта на коронавирусот ќе бидат ефикасни против новите варијанти и дали треба да се редизајнираат.

Овие резултати сугерираат дека вакцините специјализирани за еден сој биле помалку ефикасни против другите соеви, како и дека вакцините дизајнирани за оригиналната варијанта, кои во моментов се даваат, нудат најдобра заштита од сите соеви и дека треба да се користат во програмата за имунизација.