Секојдневниот пост е ефикасен начин за намалување на телесната тежина и крвниот притисок, покажало истражувањето кое ја проучувало исхраната на луѓе со прекумерна тежина, која се темели на 16 – часовен пост и 8 – часовен период во кој е дозволена консумација на храна (16:8).
Во истражувањето учествувале 23 прекумерно тешки луѓе на просечна возраст од 45 години и просечен индекс на телесна маса (БМИ) од 35 кг/м2. На испитаниците им било дозволено помеѓу 10 и 18 часот да консумираат каков било тип на храна и во која било количина, но останатите 16 часа од денот консумирале само вода или друга нискокалорична течност. Учесниците во истражувањето биле следени 12 недели.
Во споредба со контролната група од претходните истражувања на други облици на постови било утврдено дека луѓето кои се придржувале кон временски ограничената исхрана во организмот внеле помалку калории, поради што им се намалила телесната тежина и им се подобрил крвниот притисок.
Испитаниците консумирале просечно 350 калории помалку, изгубиле околу 3 % од нивната телесна маса, а систолниот крвен притисок им се намалил за 7 mmHg
Другите мерки, како масното ткиво, инсулинската резистенција и холестеролот, останале речиси исти како и кај контролната група.
Предноста на исхраната 16:8 е што е многу полесна за држење од другите, а истражувачите откриле дека помалку учесници во студијата се откажале од неа, отколку од другите начини на исхрана. Но, иако е забележано опаѓање на телесната маса, се уште не е точно утврдено дали овој начин на исхрана е подобар од другите.
Имено, добиените податоци упатуваат на ветувачка техника за губење на тежината кај оние со вишок на килограми, но за подетални информации се потребни подолгорочни и рандомизирани истражувања, пишува „Nutrition and Healthy Aging“.
