Стевиата, или Stevia rebaudiana, е растение кое потекнува од Јужна Америка, каде луѓето стотици години наназад ги користеле нејзините лисја како засладувачи. Во текот на 1970-тите стевиата стана популарна во Јапонија, а на американскиот пазар и во останатиот дел од светот беше откриена пред само десетина години.
Денес стевиата е меѓу најпопуларните засладувачи во светот, бидејќи содржи нула калории.
За разлика од вештачките засладувачи, кои се направени во лабораторија, стевиата се добива со преработка на листовите на растението. Екстрактот што се добива во процесот на обработка на лисјата е до 350 пати посладок од шеќерот.
Иако е исклучително слатка, стевиата не влијае на нивото на шеќер во крвта, што ја прави идеална за луѓе со дијабетес тип 2, но и за оние кои сакаат да ја намалат телесната тежина.
Сепак, стевиата и нејзиното влијание на здравјето на луѓето, сѐ уште е предмет на истражувања. За здравите луѓе нема конкретни докази дали ќе бидат поздрави или ќе ги намалат ризиците за развој на некот тип на дијабетес ако употребува стевиа наместо шеќер. Единствената докажана корист од овој засладувач е дека е погоден за дијабетичари. Постојат индикации дека стевиата е добра за одржување на крвниот притисок, но за тоа нема конкретни докази. Едноставно, користењето стевиа ќе помогне да се избегнат лошите страни на консумацијата на шеќер.
