Понекогаш се чувствувате тажно или осамено – тоа е сосема нормално, но поразителен е податокот дека сè поголем број на луѓе страдаат од депресија, а притоа не ја доживуваат како сериозен проблем или едноставно не умеат да ја препознаат.
Модерниот и брз начин на живот, работните обврски и семејни проблеми придонесуваат голем дел од луѓето да не можат да стигнат да се грижат за своето ментално здравје. Депресијата е еден од најголемите уништувачи на нормалното функционирање на организмот и треба сериозно да се сфати и во зависност од тежината да се лекува како и секоја друга болест.
Со цел луѓето полесно да ја препознаат и да се обратат на стручни лица за помош, Националниот институт за ментално здравје на САД ги набројува симптомите кои ја отсликуваат депресијата. Доколку се препознаете во нив, задолжително обратете се на лекар или барем кај ваш близок човек за да го почнете лекувањето.
Симптоми на депресија
- тешко се концентрирате, тешко помните детали и уште потешко носите одлуки (дури и најмали),
- уморни сте или постојано ви недостасува енергија,
- често чувствувате грижа на совест околу нешто, се чувствувате помалку вредно и/или беспомошно,
- страдате од несоница, тешко се будите наутро или друга крајност – премногу спиете и долго останувате во кревет,
- лесно се нервирате, реагирате на секоја ситница,
- немате желба и волја да се занимавате со хоби и со работи кои инаку ве радувале,
- немате желба за интимни односи,
- јадете премалку или премногу – апетитот драстично ви се променил во една или друга крајност,
- физички се чувствувате лошо, имате проблеми со столицата, главоболки и грчеви, а симптомите се враќаат дури и ако се смират на одреден период,
- често се чувствувате тажно, анксиозно или „празно“ и незадоволно,
- размислувате за самоубиство, сте се обиделе да го извршите или намерно сте се повредиле.
