Високото ниво на јаглероден диоксид во атмосферата влијае на намалувањето на интелектуалните способности кај луѓето, посочува ново американско истражување чии резултати се објавени на страницата Phys.org. Зголемените нивоа на јаглерод влијаат погубно врз природата, а тоа може да се види кога станува збор за климатските промени. Научниците дошле до сознанија дека, за жал, лошо влијае и врз учењето кај децата.
И досега се знаеше дека непроветрена просторија им попречува на умствените способности, како и на концентрацијата, но не беше проучено влијанието на „свежиот“ воздух однадвор, што веќе е, исто така, прилично загаден.
При истражувањето се дефинирани две тези – при пооптимистичкото сценарио умствените способности на учениците ќе се намалат за 25 отсто до 2100 година, но во случај ако отсега почнат да се намалуваат издувните гасови. Доколку нивото на штетни честички во воздухот остане на сегашното ниво, луѓето до крајот на векот ќе бидат, во просек, за 50 отсто понеинтелигентни.
Во 2015 година, стручњаци од Харвард спровеле сличен експеримент. Имено, тие натерале 24 лица доброволци да минат шест работни дена во лабораториски контролирани услови, при што нивоата на јаглеродниот диоксид варирале. Така, секое попладне испитаниците требало да се справат со задачи од секојдневието. Се покажало дека кога нивоата на гасот се зголемени, луѓето имале тешкотии со анализирање податоци, правење планови, носење одлуки, како и намалена способност да реагираат на криза.
