![losa ishrana](https://panacea.mk/wp-content/uploads/2018/03/losa-ishrana-696x392.jpg)
Одделни поранешни истражувања веќе укажале на негативното влијание на брзата храна врз здравјето – имено, исхраната богата со масна, премногу солена или слатка храна може да доведе до зголемување на телесната тежина и дебелина, како и појава на дигестивни тегоби како што се киселини и запек, го зголемува ризикот од астма кај адолесцентите, а лошо влијае и на плодноста кај мажите. Меѓутоа, една неодамнешна студија на група американски и кинески научници покажала дека – не само што брзата храна влијае на цревната флора, туку дека подеднакво лошо дејство врз здравјето на цревата има и стресот.
До овој заклучок научниците дошле врз основа на истражувања спроведени на група глувци – половина од нив во период од неколку недели биле на режим на исхрана богата со брза храна, додека другата половина била изложена на интензивен стрес. Научниците потоа ги испитувале промените во цревната флора на глувците и тоа на база на анализа на столицата. Утврдиле дека стресот доведува до исти промени во цревната флора како и лошата исхрана, а овој ефект бил особено воочлив кај женките. Авторите на студијата сметаат дека, иако овде станувало збор за истражување направено над животни, сличен резултат може да се очекува и кај луѓето.