Познато е дека ризик факторите за дијабетес тип 2 се дебелината, хипертензијата (висок крвен притисок) и седечкиот начин на живот, но нова студија укажува дека стресот исто така може да има улога во развојот на оваа состојба кај жените.
Резултатите од истражувањето покажале дека зголемувањето на стресот по трауматски случувања, семејни проблеми, како и проблеми на работното место, поврзани се со двојно поголем ризик од развој на дијабетес тип 2 кај жените во повозрасните години.
Она што го истакнуваат истражувачите е дека двете форми на стрес, акутен и хроничен може да го зголемат ризикот од развој на дијабетес тип 2.
Според мислењето на стручњаците, психосоцијалните стресови, како ризик фактори за дијабетес, мора да се сфатат сериозно, исто како и останатите докажани причинители кои носат ризик од развој на ова заболување.
Дијабетесот е хронична болест при која телото не може на соодветен начин да го регулира нивото на шеќер во крвта. Зголеменото ниво на глукоза во крвта може да доведе до бројни здравствени проблеми, вклучувајќи болести на срцето, мозочен удар и болести на бубрезите.
